Psalmyn 65 - Lioar ny Psalmyn 1765 (Pointed)

EVENING PRAYER. PSAL. 65. Te decet hymnus.

¹ T’ow uss, O Yee, er ny voylley ayns Sion: as dhyts vees y breearrey er ny chooilleeney ayns Jerusalem.

² Uss ta clashtyn y phadjer: hoods nee dy-chooilley eill cheet.

³ Ta my ghrogh-yannoo geddyn y varriaght orrym: O bee uss myghinagh da nyn beccaghyn.

⁴ Bannit ta’n dooinney t’ow uss dy reih, as dy ghoaill hood hene: nee eh vaghey ayns dty choort, as bee eh jeant magh lesh eunyssyn dty hie, dy-jarroo dy dty hiamble casherick.

⁵ Nee oo jeeaghyn dooin reddyn yindyssagh ayns dty chairys, O Yee nyn Saualtys: uss ta sauchys ooilley khing y theihll, as dauesyn ta cummal er y faarkey lhean.

⁶ Ta ayns e niart soiaghey ny sleïtyn dy-shickyr: as t’er ny chomm'rey lesh pooar.

⁷ Ta kuinaghey sterrym ny marrey: as feiyr ny tonnyn echey, as mee-reilltys y pobble.

⁸ Adsyn myrgeddin ta vaghey ayns ny ayrnyn sodjey magh jeh’n seihll, vees agglagh roish dty chowraghyn: uss ta cur er immeeaght [coorse] y voghrey as yn astyr dy chur dhyt moylley.

⁹ T’ow cheet dy yeeaghyn y thalloo, as dy vannaghey eh: t’ow jannoo eh feer vessoil.

¹⁰ Ta awin Yee laane dy ushtey: t’ow cur er yn arroo oc bishaghey; son myr shoh t’ow kiarail son y seihll.

¹¹ T’ow gushtaghey ny creaghyn eck, t’ow cur fliaghey neose er ny coanyn beggey eck: t’ow boggaghey ee lesh ny bineyn dy ’liaghey, as bannaghey yn mess eck.

¹² T’ow coamrey yn vleïn lesh dty vieys: as ta dty vodjallyn shilley neose meeaylys.

¹³ Nee ad shilley neose er cummallyn yn aasagh, as gow-ee ny croink veggey boggey er dagh cheu.

¹⁴ Bee ny bwoailchyn laane dy chirree: nee ny coanyn myrgeddin shassoo cha chiu lesh arroo, dy jean ad gearey as goaill arrane.