Psalmyn 63 - Lioar ny Psalmyn 1765 (Pointed)

PSAL. 63. Deus, deus meus.

¹ O Yee, uss my Yee: dy-moghey nee’m dty hirrey.

² Ta m’annym pa-agh er dty hon, ta m’eill myrgeddin goaill foddiaght dty yeï: ayns thalloo gennish as chirrym raad nagh vel veg yn ushtey.

³ Myr shoh ta mee er yeeaghyn er dty hon ayns casherickys: dy voddin dty phooar as dty ghloyr y akin.

⁴ Son ta dty chenjallys-ghraihagh ny share na’n vioys hene: nee my veillyn oo y voylley.

⁵ Choud’s vee’m bio ver-ym ard-voylley dhyt er yn aght shoh: as trogg-ym seose my laueyn ayns dt’Ennym.

⁶ Bee m’annym er ny yannoo magh, dy-jarroo myr dy beagh eh lesh smuir as meeaylys: tra ta my veeall dy dty voylley lesh meillyn gerjoil.

⁷ Nagh vel mee er chooinaghtyn orts ayns my lhiabbee: as er smooinaghtyn ort tra va mee doostey?

⁸ Er-yn-oyr dy vel oo er ve m’er-coonee: shen-y-fa fo scaa dty skainyn goym boggey.

⁹ Ta m’annym lhiantyn hoods: ta dty laue yesh er my chummal seose.

¹⁰ Ad shoh myrgeddin ta shirrey aggair m’annym: hed ad fo’n thalloo.

¹¹ Lhig daue tuittym er foyr y chliwe: dy vod ad ve son beaghey da shynnee.

¹² Agh gow-ee yn Ree boggey ayns Jee; adsyn ooilley myrgeddin ta lhoo biallys dasyn, vees er nyn moylley: son bee yn beeall ocsyn ta loayrt breagyn er ny yeigh.