Psalmyn 59 - Lioar ny Psalmyn 1765 (Pointed)

EVENING PRAYER. PSAL. 59. Eripe me de inimicis.

¹ Livrey mee veih my noidyn, O Yee: jean m'y endeil vowesyn ta girree-magh m’oï.

² O livrey mee veih ny drogh-yantee: as saue mee veih ny deiney ta pa-agh lurg fuill.

³ Son cur-my-ner, t’ad lhie farkiaght son my vioys: ta ny deiney niartal er nyn jaglym m’oï, fegooish foill ny aggair erbee voyms, O Hiarn.

⁴ T’ad roih as jannoo ad hene aarloo fegooish foill erbee ayn-yms: trog ort er-y-fa shen dy chooney lhiam, as cur-my-ner.

⁵ Shass seose, O Hiarn Yee dy heshaght-chaggee flaunys, uss Yee Israel, dy ghoaill kerraghey er ooilley ny ashoonyn: as ny bee myghinagh dauesyn ta ass olkys goanlyssagh jannoo aggair.

⁶ T’ad goll noon as noall ’syn astyr: t’ad grindee myr moddey, as roih mygeayrt trooid yn ard-valley.

⁷ Cur-my-ner, t’ad loayrt lesh nyn meeall, as ta cliwnyn ayns nyn meillyn: son quoi ta clashtyn?

⁸ Bee ad, O Hiarn, ayds ayns faghid: as nee oo garaghtee er ooilley ny ashoonyn-quaagh gys craid.

⁹ My niart goym rish dy nee voïds te: son uss yn Jee dy my chemmyrk.

¹⁰ Ta Jee jeeaghyn dou e vieys dy-palchey: as lhiggee Jee dou my yeearree y akin er my noidyn.

¹¹ Ny marr ad, er aggle dy jarrood my phobble eh: agh skeayll ad dy-lhean mastey’n pobble, as cur sheese ad, O Hiarn, nyn vendeilagh.

¹² Kyndagh rish peccah nyn meeall, as goan nyn meillyn, bee ad goit ayns y voyrn oc hene: as cre’n-oyr? ta’n ghlare oc jeant jeh gweeaghyn as breagyn.

¹³ Cur mow ad ayns dty chorree, cur mow ad, dy vod ad cherraghtyn: as toiggal dy nee Jee ta reill ayns Jacob, as gys khing y theihll.

¹⁴ As ayns yn astyr nee ad chyndaa reesht: grindee myr moddey, as hed ad mygeayrt yn ard-valley.

¹⁵ Roih-ee ad noon as noall son bee: as gow-ee ad dy-olk rish mannagh bee ad jeant magh.

¹⁶ Er my hon’s, goym arrane jeh dty phooar, as nee’m dty vyghin y voylley dy-leah ’sy voghrey: son t’ow uss er ve my choadey as my chemmyrk ayns laa my heaghyn.

¹⁷ Hoods, O my niart, goym arrane: son t’ow uss, O Yee, my chemmyrk, as my Yee vyghinagh.