Psalmyn 58 - Lioar ny Psalmyn 1765 (Pointed)

PSAL. 58. Si vere utique.

¹ Vel nyn aignaghyn soit er cairys, O shiuish phobble: as vel shiu briwnys shen ta cairagh, O shiuish cloan gheiney?

² Dy-jarroo ta shiu smooinaghtyn er olkys ayns nyn gree er y thalloo: as ta ny laueyn eu dellal rish mee-chraueeaght.

³ Ta ny mee-chrauee frourtagh, dy-jarroo veih breïn nyn mayrey: cha leah as t’ad er nyn ruggey, t’ad goll er-shaghryn, as loayrt breagyn.

⁴ T’ad cha nieunagh as pyshoon ard-nieu: dy-jarroo myr yn addyr bouyr ta dooney ny cleayshyn eck;

⁵ Ta gobbal dy eaishtagh rish bingys y khiaullyder: lhig e haase-kiaullee ’ve cha millish as sallish.

⁶ Brish ny feeacklyn oc, O Yee, ayns nyn meeall; bwoaill craueyn-keeill ny lionyn, O Hiarn: lhig daue tuittym ersooyl myr ushtey ta roih dy-tappee; as tra t’ad lhiggey nyn sideyn, lhig daue ve astyrit ass ny fraueyn.

⁷ Lhig daue lheïe ersooyl myr crammag, as ve goll-rish mess ben ta er jeet roish y traa: as ny lhig daue fakin y ghrian.

⁸ Ny roish ta ny pooiyt eu er ny chiow lesh drineyn: myr shen lhig da jymmoose eh y heaghney myr red ta’n vio rish.

⁹ Gow-ee yn dooinney cairagh boggey tra hee eh yn kerraghey: nee eh e chesmadyn y niee ayns fuill ny mee-chrauee.

¹⁰ Myr shen dy jirr dooinney, Dy-firrinagh ta leagh gour y sleih cairagh: gyn dooyt ta Jee ayn ta briwnys y theihll.