Psalmyn 57 - Lioar ny Psalmyn 1765 (Pointed)

PSAL. 57. Miserere mei, Deus.

¹ Bee myghinagh dooys, O Yee, bee myghinagh dou, son ta m’annym treishteil ayn-yd: as fo scaa dty skainyn vees my chemmyrk derrey vees y tranlaase shoh er n’gholl shiagh-ym.

² Nee’m geam gys y Jee smoo ard: dy-jarroo gys y Jee nee yn chooish t’aym ayns laue y chooilleeney.

³ Ver eh cooney hym veih niau: as sauee eh mee veih’n scammylt echeysyn ballish mee y stroie.

⁴ Ver Jee magh e vyghin as e ynrickys: ta m’annym mastey lionyn.

⁵ As ta mee my lhie dy-jarroo mastey cloan gheiney, ta soit er aile: nyn veeacklyn t’ad shleïghyn as sideyn, as nyn jengey ny chliwe gyere.

⁶ Soie oo hene seose, O Yee, er-skyn ny niaughyn: as dty ghloyr er-skyn ooilley’n seihll.

⁷ T’ad er hoiaghey lieen son my chassyn, as er hionney sheese m’annym: t’ad er chleigh jeeg roym, as ad hene er duittym ayns y vean echey.

⁸ Ta my chree soit, O Yee, ta my chree soit: goym arrane, as ver-ym moylley.

⁹ Dooisht seose, my ghloyr; dooisht lute as chlaasagh: dooisht-yms mee hene feer voghey.

¹⁰ Ver-ym booise dhyts, O Hiarn, mastey’n pobble: as goym arrane hoods mastey ny ashoonyn;

¹¹ Son ta mooads dty vyghin roshtyn gys ny niaughyn: as dt’irriney gys ny bodjallyn.

¹² Soie oo hene seose, O Yee, er-skyn ny niaughyn: as dty ghloyr er-skyn ooilley yn seihll.