Psalmyn 55 - Lioar ny Psalmyn 1765 (Pointed)

PSAL. 55. Exaudi, Deus.

¹ Clasht rish my phadjer, O Yee: as ny follee oo hene veih my accan.

² Gow tastey jee’m, as eaisht rhym: kys ta mee gaccan ayns my phadjer, as ta mee seaghnit.

³ Ta lheid yn ullagh er my noid, as ta ny mee-chrauee cheet orrym cha chion: son t’ad kiarit dy yannoo olk ennagh dou, cha goanlyssagh shen t’ad soit m’oï.

⁴ Ta my chree anveagh cheu-sthie jee’m: as ta aggle y vaaish er duittym orrym.

⁵ Ta aggle as creau er jeet orrym: as ta atchim seaghnagh er my hilgey harrish.

⁶ As dooyrt mee, O dy beagh aym skainyn myr t’ec calmane: son eisht etlin ersooyl, as veïn ec fea.

⁷ Cur-my-ner, yinnin eisht cosney roym foddey jeh: as fuirraght ayns yn aasagh.

⁸ Yinnin siyr dy scapail: kyndagh rish y gheay stermagh as y dorrin.

⁹ Stroie ny chengaghyn oc, O Hiarn, as cur ad noï-ry-hoï: son ta mee er vakin neu-chairys as streeu ayns yn ard-valley.

¹⁰ Laa as oie t’ad goll mygeayrt ny voallaghyn eck: ta olkys neesht as trimshey ’sy vean eck.

¹¹ Olkys t’ayn: cha vel molteyraght as foalsaght goll ass ny straidyn oc.

¹² Son cha nee noid foshlit t’er n’yannoo yn vee-onnor shoh dou: son eisht oddin v’er ymmyrkey eh.

¹³ Cha-moo she fer va ayns drogh aigney dou hrog eh hene seose m’oï: son eisht foddee dy beïn er vollaghey mee hene veih;

¹⁴ Agh oo hene v’ayn, my heshey: my leeideilagh, as my charrey ainjyssagh.

¹⁵ Ghow shin coyrle villish cooidjagh, as ren shin shooyll gys thie Yee myr caarjyn.

¹⁶ Lhig da baase cheet orroo dy-siyragh, as lhig daue goll sheese bio ayns yn oaie: son ta olkys ayns nyn gummallyn, as ny mast’ oc.

¹⁷ Er my hon’s, eïe-ym er Jee: as nee’n Chiarn m'y hauail.

¹⁸ Fastyr, as moghrey, as ec y vun-laa nee’m padjer y ghoaill, as shen dy-jeean: as clynnee eh my choraa.

¹⁹ She eshyn ta er livrey m’annym ayns shee, veih’n chaggey va m’oï: son va ymmodee mârym.

²⁰ Dy-jarroo, Jee hene, ta farraghtyn dy-bragh, nee m'y chlashtyn, as ver lesh adsyn sheese: son cha jean ad chyndaa, ny goaill aggle roish Jee.

²¹ Chur eh [yn noid] e laueyn orroosyn va ayns shee rish: as vrish eh e chonaant.

²² Va goan e veeall ny s’buiggey na eeym, as caggey ayns e chree: va e ghoan ny shliawney na ooïll, as foast t’ad cliwnyn hene.

²³ O tilg dty errey er y Chiarn, as nee eh dty chummal seose: as cha lhig eh da’n fer-cairagh tuittym son dy-bragh.

²⁴ Agh er nyn son ocsyn: ver uss lhiat ad, O Yee, ayns yn ooig dy hoyrt-mow.

²⁵ Cha bee ny deiney foalley as molteyragh bio yn derrey lieh jeh nyn laghyn: agh bee my hreishteil ayn-yds, O Hiarn.