Psalmyn 51 - Lioar ny Psalmyn 1765 (Pointed)

PSAL. 51. Miserere mei, Deus.

¹ Jean myghin orrym, O Yee, lurg dty vieys vooar: cordail rish ymmodee dty vyghinyn cur ersooyl my loghtyn.

² Niee mee dy-bollagh veih m’olkys: as glen mee veih my pheccah.

³ Son ta mee goaill-rish m’oiljyn: as ta my pheccah kinjagh kiongoyrt rhym.

⁴ Dt’oï’s dty-lomarcan ta mee er n’yannoo peccah, as er chur rish yn olk shoh ayns dty hilley: dy voddagh oo v’er dty heyrey ayns dty raa, as ynrick tra t’ow briwnys.

⁵ Cur-my-ner va mee er my chummey ayns olkys: as ayns peccah ren my voir m'y yiennaghtyn.

⁶ Agh cur-my-ner, t’ow shirrey firrinys ayns ny ayrnyn er cheu-sthie: as ver oo orrym toiggal creenaght dy-follit.

⁷ Nee oo mish y ghlenney lesh hyssop, as bee’m glen: nee oo m'y niee, as bee’m ny s’gilley na sniaghtey.

⁸ Ver oo orrym clashtyn jeh boggey as gennallys: dy vod ny craueyn t’ow er vrishey boggey ’ghoaill.

⁹ Chyndaa dt’eddin veih my pheccah: as cur ersooyl ooilley my ghrogh-yannoo.

¹⁰ Croo ayn-ym cree glen, O Yee: as jean ass-y-noa spyrryd cairagh cheu-sthie jee’m.

¹¹ Ny tilg mee ersooyl veih dt’enish: as ny gow dty Spyrryd Casherick voym.

¹² O cur dou reesht gerjagh dty chooney: as niartee mee lesh dty Spyrryd arryltagh.

¹³ Eisht nee’ms dty raaidyn y ynsaghey da ny mee-chrauee: as bee peccee er nyn jyndaa hoods,

¹⁴ Livrey uss mee veih loght-foalley, O Yee, uss ta Jee my lhaynt: as nee my hengey arrane y ghoaill jeh dty chairys.

¹⁵ Nee uss my veillyn y osley, O Hiarn: as nee my veeall soilshaghey magh dty voylley.

¹⁶ Son cha vel oo shirrey oural, nonney yinnin dhyt eh: cha vel taitnys ayd ayns chebballyn-losht.

¹⁷ Ta ourallyn Yee spyrryd seaghnit: cree brisht as arryssagh, O Yee, cha soie uss beg jeh.

¹⁸ O bee uss foayroil as graysoil da Sion: trogg seose voallaghyn Yerusalem.

¹⁹ Eisht nee uss boggey ’ghoaill aynsyn lesh oural dy chairys, ayns ourallyn-losht as chebballyn: eisht nee ad chebbal dew aegey er dt’altar.