Psalmyn 48 - Lioar ny Psalmyn 1765 (Pointed)

PSAL. 48. Magnus Dominus.

¹ Mooar ta’n Chiarn, as dy-ard dy v’er ny voylley: ayns ard-valley yn Jee ain, dy-jarroo er e chronk chasherick.

² Ta cronk Sion ynnyd aalin, as boggey yn seihll ooilley: er y cheu tooai ta ard-valley yn Ree mooar; te ry akin dy vel Jee ayns ny plaasyn ec myr kemmyrk shickyr.

³ Son cur-my-ner, ta reeaghyn y thallooin: er nyn jaglym, as er n’gholl shiaghey cooidjagh.

⁴ Ghow ad yindys dy akin lheid ny reddyn: v’ad lhieent lesh atchim, as ayns y tullogh chaill ad nyn gree.

⁵ Haink aggle orroo, as trimshey: myr er ben er-troailt.

⁶ Nee uss brishey lhongyn ny marrey: lesh y gheay nharr.

⁷ Myr ta shin er chlashtyn, myr shen ta shin er vakin ayns ard-valley yn Chiarn dy heshaght-chaggee flaunys, ayns ard-valley yn Jee ain: ta Jee dy chummal eh seose son dy-bragh.

⁸ Ta shin farkiaght er dty chenjallys-ghraihagh, O Yee: ayns mean dty hiamble.

⁹ O Yee, myr ta dt’Ennym, myr shen ta dty voylley gys king y theihll: ta dty laue yesh laane dy chairys.

¹⁰ Lhig da’n cronk Sion goaill boggey, as inneen Yudah ve gennal: er coontey dty vriwnyssyn.

¹¹ Shooill mygeayrt Sion, as immee mygeayrt-y-mooee: as gow-jee coontey ny tooryn eck.

¹² Gow tastey vie jeh ny voallaghyn lajer ec, soie-jee seose ny thieyn ec: dy vod oo ginsh dauesyn hig nyn yeï.

¹³ Son she’n Jee shoh yn Jee ain son dy-bragh as dy-bragh: eshyn vees y leeideilagh ain gys laa nyn maaish.