Psalmyn 45 - Lioar ny Psalmyn 1765 (Pointed)

PSAL. 45. Eructavit cor meum.

¹ Ta my chree smooinaghtyn er cooish vie: ta mee loayrt rish y Ree ny reddyn ta mee er n’yannoo.

² Ta my hengey myr fedjag-screeuee: yn scrudeyr tappee.

³ T’ow ny s’aailey na cloan gheiney: laane dy ghrayse ta dty veillyn, er-y-fa dy vel Jee er dty vannaghey son dy-bragh.

⁴ Kiangle dty chliwe gys dty lheayst, O uss smoo niartal: cordail rish dty ooashley as dty ghloyr.

⁵ Ayïh mie dy row lhiat lesh dty ooashley: markee er dty hoshiaght, er coontey yn goo dy firrinys, dy veenid, as dy chairys; as nee dty laue yesh reddyn atchimagh y ynsaghey dhyt.

⁶ Ta dty hideyn feer virragh, as bee’n pobble er nyn injillaghey hoods: dy-jarroo ayns y vean mastey noidyn y Ree.

⁷ Ta dty stoyl, O Yee, farraghtyn son dy-bragh: ta lorg-reill dty reeriaght lorg-reill chairagh.

⁸ T’ow er choyrt graih da cairys, as feoh da mee-chairys: shen-y-fa ta Jee, dy-jarroo yn Jee ayds, er dt’ooïllaghey lesh yn ooïll dy yennallys er-skyn dty heshaghyn.

⁹ Ta ooilley dty gharmadyn soaral jeh myrrh, aloes, as cassia: magh ass ny plaasyn ivory, lhieu t’ad er dty yannoo gennal.

¹⁰ Va inneenyn reeaghyn mastey dty vraane ooasle: er dty laue yesh hass y ven-reïn ayns coamrey d’airh, obbrit mygeayrt lesh caghlaaghyn daah.

¹¹ Clasht, O inneen, as smooinee, cromm dty chleaysh: jarrood myrgeddin dty phobble hene, as thie dty ayrey.

¹² Myr shen bee taitnys ec y Ree ayns dty aalid: son eshyn y Chiarn dty Yee, as cur uss ooashley da.

¹³ As bee inneen Tyre ayns shen lesh gioot: myr nee ny berchee myrgeddin mast’ yn pobble nyn aghinyn y yannoo kiongoyrt rhyt.

¹⁴ Ta inneen y Ree ooilley gloyroil er cheu-sthie: ta’n coamrey eck dy airh obbrit.

¹⁵ Bee ee er ny choyrt lh'ee gys y Ree ayns garmad dy obbyr snaidey: ny moidynyn ta e sheshaghyn, cummee ad sheshaght r'ee, as bee ad er nyn jebbal hoods.

¹⁶ Lesh boggey as gennallys vees ad er nyn goyrt lhieu: as hed ad stiagh ayns plaase y Ree.

¹⁷ Ayns ynnyd dt’ayraghyn bee ayd cloan: ad oddys oo y yannoo prinsyn ayns dy-chooilley cheer.

¹⁸ Cooin-yms er dt’Ennym veih sheeloghe gys sheeloghe: shen-y-fa ver y pobble booise dhyt, seihll gyn jerrey.