Psalmyn 41 - Lioar ny Psalmyn 1765 (Pointed)

EVENING PRAYER. PSAL. 41. Beatus qui intelligit.

¹ Bannit t’eshyn ta smooinaghtyn er y voght as yn ymmyrchagh: nee’n Chiarn eshyn y livrey ayns traa e heaghyn.

² Dy jean y Chiarn eshyn y choadey as y reayll bio, dy vod eh ve bannit er y thalloo: as ny livrey uss eh gys aigney e noidyn.

³ Dy jean y Chiarn eh y gherjaghey tra t’eh ny lhie dy-ching er e lhiabbee: jean uss ooilley e lhiabbee ayns e hingys.

⁴ Dooyrt mee, Hiarn, bee myghinagh dou: slaanee m’annym, son ta mee er n’yannoo peccah dt’oï.

⁵ Ta my noidyn loayrt dy-olk jee’m: Cooinn yiow eh baase, as cooinn nee e ennym cherraghtyn?

⁶ As my t’eh cheet dy my yeeaghyn, t’eh loayrt dy-foalsey: as ta e chree giennaghtyn molteyrys cheu-sthie jeh; as tra t’eh goll roish t’eh d’insh eh.

⁷ Ta ooilley my noidyn sonsheraght cooidjagh m’oï: dy-jarroo m’oï t’ad smooinaghtyn er yn olk shoh.

⁸ Lhig da’n vriwnys ta cair da fer-kyndagh goll magh n’oï: as nish dy vel eh ny lhie, ny lhig da girree seose arragh.

⁹ Dy-jarroo, my charrey ainjyssagh hene, er hug mee my hreisht: eshyn ren neesht gee jeh m’arran, t’eh dy-mooar farkiaght dy-follit er my hon.

¹⁰ Agh bee uss myghinagh dou, O Hiarn: jean uss m'y hroggal seose reesht, as nee’m ad y chooilleeney.

¹¹ Liorish shoh ta fys aym dy vel oo foayroil dou: nagh vel my noid geddyn barriaght m’oï.

¹² As tra ta mee ec my lhaynt, t’ow dy my chummal seose: as nee oo m'y hoiaghey kiongoyrt rish dt’eddin er son dy-bragh.

¹³ Bannit dy row yn Chiarn Jee d’Israel: seihll gyn jerrey. Amen.