Psalmyn 4 - Lioar ny Psalmyn 1765 (Pointed)

PSAL. 4. Cum invocarem.

¹ Clasht rhym tra ta mee geamagh, O Yee my chairys: t’ow er choyrt feaysley dooys tra va mee ayns seaghyn; jean myghin orrym, as eaisht rish my phadjer.

² O shiuish vec gheiney, caid nee shiu goltooan my ooashley: as goaill lheid y taitnys ayns coyrlyn fardalagh, as geiyrt da breagyn?

³ Toigg-jee shoh neesht, dy vel y Chiarn er reih da hene yn dooinney ta crauee: tra nee’m geamagh er y Chiarn, nee eh clashtyn rhym.

⁴ Shass-jee ayns aggle, as ny jean-jee peccah: smooinee-jee dy-dowin ayns nyn gree hene, as ayns nyn shamyr, as bee-jee ec shee.

⁵ Cheb-jee yn oural dy chairys: as cur-jee nyn dreishteil ayns y Chiarn.

⁶ Shimmey t’ayn ta gra: Quoi yeeaghys dooin veg y vie?

⁷ Hiarn, trogg uss seose: soilshey dt’eddin orrin.

⁸ T’ow er choyrt gennallys ayns my chree: er dyn traa dy ren yn arroo, as y feeyn, as yn ooïll ocsyn bishaghey.

⁹ Nee’ms lhie sheese ayns shee, as goaill my ea: son she uss, Hiarn, dty lomarcan, ta coyrt orrym vaghey ayns sauchys.