Psalmyn 38 - Lioar ny Psalmyn 1765 (Pointed)

MORNING PRAYER. PSAL. 38. Domine, ne in furore.

¹ Ny cur oghsan dooys, O Hiarn, ayns dty chorree: cha-moo jean m'y smaghtaghey ayns dty yymmoose hrome.

² Son ta dty hideyn soit dy-shickyr ayn-ym: as ta dty laue lhie orrym dy-trome.

³ Cha vel veg y slaynt ayns m’eill kyndagh rish dty yymmoose: cha-moo ta fea erbee ayns my chraueyn, kyndagh rish my pheccah.

⁴ Son ta my pheccaghyn er n’gholl harrish my chione: as t’ad myr errey seaghnagh, ro hrome er my hon dy ymmyrkey.

⁵ Ta soar trome jeh my lottyn, as t’ad breïn: trooid my ommijys.

⁶ Ta mee er jeet gys lheid y seaghyn mooar as treihys: dy vel mee goll dobberan fey-ny-laa.

⁷ Son ta my veeaghyn lhieent lesh doghan brogh: as cha vel ayrn erbee slane ayns my chorp.

⁸ Ta mee moal, as gooint dy-trome: ta mee er ullaghey son eer angaaish my chree.

⁹ Hiarn, ta fys ayd er ooilley my yeearree: as cha vel m’accan kellit voïd’s.

¹⁰ Ta my chree pandooagh, ta my niart er my ailleil: as ta soilshey my hooillyn er gholl voym.

¹¹ Hass my chaarjyn as my naboonyn jeeaghyn er my heaghyn: as hass my gheiney-mooinjerey foddey jeh.

¹² Adsyn neesht va sleeuit er my vioys, ren ribbaghyn y hoiaghey er my hon: as ren adsyn va shirrey dy yannoo aggair dou, taggloo jeh olkys, as smooinaghtyn er molteyraght fey-ny-laa.

¹³ Er my hon’s, va mee myr dooinney bouyr nagh row clashtyn: as myr fer ta balloo, nagh vel fosley e veeall.

¹⁴ Va mee dy-jarroo myr dooinney nagh vel clashtyn: as nagh vel fockle echey dy ghra er e hon hene.

¹⁵ Son orts, O Hiarn, ta mee er choyrt my varrant: nee uss m'y reggyrt, O Hiarn my Yee.

¹⁶ Ta mee er yeearree nagh jinnagh adsyn, dy-jarroo my noidyn, boggyssagh harrym: son tra ren my chass skyrraghtyn, ghow ad mooarane boggey m’oï.

¹⁷ As ta mish, dy-firrinagh, soit ayns y cherraghey trome: as ta my hrimshey kinjagh kiongoyrt rhym.

¹⁸ Son nee’m goaill-rish my olkys: as bee’m trimshagh son my pheccah.

¹⁹ Agh ta my noidyn bio as niartal: as t’adsyn ta dwoaie oc orrym gyn-oyr, ymmodee ayns earroo.

²⁰ Adsyn neesht ta cooilleeney olk son mie, t’ad m’oï: er-yn-oyr dy vel mee geiyrt er shen ny ta mie.

²¹ Ny treig mee, O Hiarn my Yee: ny bee uss foddey voym.

²² Jean siyr dy chooney lhiam: O Hiarn Yee my haualtys.