Psalmyn 33 - Lioar ny Psalmyn 1765 (Pointed)

PSAL. 33. Exultate, justi.

¹ Gow-jee boggey ayns y Chiarn, O shiuish sleih cairagh: son te feer chooie da’n sleih ynrick dy ve booisal.

² Moylley-jee yn Chiarn lesh y chlaasagh: gow-jee arraneyn-moyllee da lesh y lute, as y ghreïe-chiaull dy yheih strengyn.

³ Gow-jee arrane noa gys y Chiarn: trogg-jee seose nyn ghoraa huggeysyn ayns bingys dy-jeean as lesh cree gennal.

⁴ Son ta goo yn Chiarn firrinagh: as ooilley e obbraghyn ynrick.

⁵ T’eh graihagh er cairys as briwnys: ta’n seihll laane jeh mieys y Chiarn.

⁶ Liorish goo yn Chiarn va ny niaughyn er nyn groo: as ooilley ny pooaraghyn oc liorish ennal e veeal.

⁷ T’eh chaglym ushtaghyn ny marrey cooidjagh, myr carnane: as freayll fo yn diunid vooar myr ayns thie-tashtee.

⁸ Lhig da’n seihll ooilley aggle ’ghoaill roish y Chiarn: bee-jee er-creau roïshyn, ooilley shiuish cummaltee yn thallooin.

⁹ Son loayr eh, as ve jeant: hug eh saarey, as hass eh shickyr.

¹⁰ Ta’n Chiarn coyrt bun-ry-skyn coyrle ny ashoonyn: as cur er saaseyn croutagh y phobble dy ve gyn-ymmyd, as cur shaghrynys er coyrleyn ny prinsyn.

¹¹ Nee coyrle y Chiarn farraghtyn son dy-bragh: as smooinaghtyn e chree veih sheeloghe gys sheeloghe.

¹² Bannit yn pobble ta’n Jee oc yn Chiarn Jehovah: as bannit ta’n sleih t’eh er reih son e eiraght.

¹³ Yeeagh y Chiarn neose veih niau, as chur eh my-ner ooilley cloan gheiney: veih stoyl-reeoil e ynnyd-vaghee ta sooill echey er cummaltee yn theihll.

¹⁴ T’eh cummey ooilley ny creeaghyn oc: as toiggal ooilley nyn obbraghyn.

¹⁵ Cha vel Ree erbee oddys v’er ny hauail liorish niart e heshaght-chaggee: cha-moo ta dooinney lajer erbee er ny livrey liorish mooarane niart.

¹⁶ Cha vel cabbyl coontit agh red fardalagh dy hauail dooinney: cha-moo oddys eh livrey dooinney erbee liorish mooad's e niart.

¹⁷ Cur-my-ner ta sooill y Chiarn orroosyn ta goaill aggle roïsh: as orroosyn ta coyrt nyn dreishteil ayns e vyghin;

¹⁸ Dy livrey yn annym oc veih baase: as dy veaghey ad ayns earish dy ghenney.

¹⁹ Ta’n annym ain dy-meen er ny ve farkiaght er y Chiarn: she eshyn nyn gooney as nyn vendeilagh.

²⁰ Son gowee nyn gree boggey aynsyn: er-yn-oyr dy vel shin er hreishteil ayns e Ennym casherick.

²¹ Lhig da dty chenjallys vyghinagh, O Hiarn, ve orrin: ’naght myr ta shin cur nyn dreishteil ayn-yd.