Psalmyn 30 - Lioar ny Psalmyn 1765 (Pointed)

MORNING PRAYER. PSAL. 30. Exaltabo te, Domine.

¹ Ver-yms ard-voylley dhyts, O Hiarn, son t’ow er my hoiaghey seose: as cha vel oo er lhiggey da my noidyn dy ve mooaralagh harrym.

² O Hiarn my Yee, deïe mee hood: as t’ow er my lheihys.

³ T’ow uss, Hiarn, er livrey m’annym veih’n oaie: t’ow er vreayll my vioys veih goll sheese gys ooig y vaaish.

⁴ Gow-jee arraneyn-moyllee gys y Chiarn, O shiuish e nooghyn: as cur-jee booise da ayns cooinaghtyn jeh e chasherickys.

⁵ Son cha vel e chorree farraghtyn agh meekey sooilley, as ayns y foayr echey ta bea: foddee trimshey farraghtyn son oie, agh ta boggey cheet ’sy voghrey.

⁶ Ayns my staydoilys dooyrt mee, Cha bee’m dy bragh er my scughey: t’ow uss, Hiarn, jeh dty vieys, er n’yannoo my chronk cha lajer.

⁷ Hyndaa oo dt’eddin voym: as va mee seaghnit.

⁸ Eisht deïe mish hood’s, O Hiarn: as chosne mee gys my Hiarn dy feer imlee.

⁹ Cre’n vondeish t’ayns my uill: tra hem sheese gys yn oaie?

¹⁰ Der y joan booise dhyt: ny jean eh soilshaghey dt’ynrickys?

¹¹ Clasht, O Hiarn, as jean myghin orrym: Hiarn, bee uss my er-coonee.

¹² T’ow er hyndaa my hrimshey gys boggey: t’ow er choyrt jee’m my aanrit-sack, as er my chomm'rey lesh gennallys.

¹³ Shen-y-fa nee dy-chooilley ghooinney mie goaill arrane jeh dty voylley fegooish skeeys: O my Yee, ver-yms booise dhyt son dy bragh.