Psalmyn 3 - Lioar ny Psalmyn 1765 (Pointed)

PSAL. 3. Domine, quid multiplicati?

¹ Hiarn, kys t’adsyn er nyn mishaghey ta dy my voirey: shimmey ad ta girree m’oï.

² Shimmey t’ayn ta gra jeh m’annym: Cha vel veg y chooney ny chour ayns e Yee.

³ Agh uss, O Hiarn, m’endeilagh: uss my ooashley, as y fer ta cummal seose my chione.

⁴ Deïe mee er y Chiarn lesh my choraa: as cheayll eh mee ass e chronk casherick.

⁵ Lhie mee sheese as chaddil mee, as dirree mee seose reesht: son ren y Chiarn m'y niartaghey.

⁶ Cha goyms aggle roish jeih millaghyn jeh’n sleih: ta er n’irree-magh m’oï er dy-chooilley cheu.

⁷ Seose, Hiarn, as cooin lhiam, O my Yee: son t’ow bwoalley ooilley my noidyn er craue-ny-keeill; t’ow er vrishey feeacklyn ny mee-chrauee.

⁸ Ta Saualtys bentyn gys y Chiarn: as ta dty vannaght er dty phobble.