Psalmyn 28 - Lioar ny Psalmyn 1765 (Pointed)

PSAL. 28. Ad te, Domine.

¹ Hoods nee’m geamagh, O Hiarn my niart: ny jean beg y hoiaghey jee’m, er aggle mannagh jean oo m'y chlashtyn, dy bee’m casley roosyn ta goll sheese gys yn oaie.

² Eaisht rish coraa my aghinyn imlee, tra ta mee geamagh ort: tra ta mee troggal seose my laueyn gys stoyl-y-vyghin dty hiamble casherick.

³ O ny tayrn mee ersooyl, cha-moo jean m'y stroie marish ny mee-chrauee as drogh yantee: ta loayrt dy-dooie rish nyn naboo, agh t’ad smooinaghtyn er olkys ayns nyn gree.

⁴ Cur daue nyn leagh cordail rish nyn yannoo: as cordail rish olkys ny croutyn oc hene.

⁵ Cooilleen ad cordail rish obbyr nyn laueyn: eeck daue shen ny t’ad er hoilchin.

⁶ Son cha vel ad ayns nyn aigney cur geill da obbraghyn y Chiarn, cha-moo da jannoo e laueyn: shen-y-fa nee eh ad y lieggal sheese, as cha jean eh ad y hroggal.

⁷ Moylley dy row da’n Chiarn: son t’eh er chlashtyn coraa my aghinyn imlee.

⁸ Yn Chiarn my niart as my eïlley-caggee; ta my chree er dreishteil aynsyn, as ta mee er gheddyn cooney: shen-y-fa ta my chree lheïm dyn voggey, as ayns my arrane nee’m eshyn y voylley.

⁹ Yn Chiarn my niart: as eshyn fendeilys slayntoil e Er-ooïllit.

¹⁰ O saue dty phobble, as cur dty vannaght da dty eiraght: cur beaghey daue, as soie ad seose er son dy-bragh.