Psalmyn 27 - Lioar ny Psalmyn 1765 (Pointed)

EVENING PRAYER. PSAL. 27. Dominus illuminatio.

¹ Yn Chiarn my hoilshey as my haualtys; quoi roish eisht ghoym aggle: yn Chiarn niart my vea; quoi roish eisht vee’m agglagh?

² Tra haink ny olkyssee, dy-jarroo my noidyn as my hranlaasee orrym dy my stroie: ren ad snapperal as tuittym.

³ Ga dy beagh sheshaght-caggee dy gheiney soit m’oï, foast cha bee my chree agglagh: as ga dy jinnagh caggey girree seose m’oï, foast ver-ym my varrant ersyn.

⁴ Un red ta mish er hirrey er y Chiarn, shen nee’m y yeearree: dy-jarroo dy voddym vaghey ayns thie yn Chiarn ooilley laghyn my vea, dy akin aalid eunyssagh y Chiarn, as dy haaghey e hiamble.

⁵ Son ayns traa my heaghyn follee eh mee ayns e chabbane: dy-jarroo ayns boayl kellit e ynnyd-vaghee nee eh m'y ollaghey, as m'y hoiaghey seose er creg chloie.

⁶ As nish troggee eh seose my chione: er-skyn my noidyn mygeayrt-y-moom.

⁷ Shen-y-fa nee’ms oural y hebbal ayns e ynnyd casherick lesh ard ghennallys: nee’m arrane y ghoaill, as soilshaghey magh moylley yn Chiarn.

⁸ Eaisht rish my choraa, O Hiarn, tra ta mee geamagh hoods: jean myghin orrym, as clasht rhym.

⁹ Ta my chree er yannoo imraa jeed’s; Shirr-jee my eddin: Dt’eddin, Hiarn, nee’ms y hirrey.

¹⁰ O ny follee dty eddin voym: cha-moo jean dty harvaant y hyndaa ersooyl ayns jymmoose.

¹¹ T’ow er ny ve my chemmyrk: ny faag mee, cha-moo jean m'y hreigeil, O Yee my haualtys.

¹² Tra ta my ayr as my voir dy my hreigeil: ta’n Chiarn dy my ghoaill seose.

¹³ Ynsee dooys dty raad, O Hiarn: as leeid mee ayns y raad cair, kyndagh rish my noidyn.

¹⁴ Ny livrey mee seose gys aigney my noidyn: son ta feanishyn foalsey er n’irree seose m’oï, as lheid as ta loayrt aggair.

¹⁵ Va mee dy-bollagh er choayll my chree: agh dy vel mee dy-shickyr credjal dy akin kenjallys y Chiarn ayns cheer ny bio.

¹⁶ O jean uss farkiaght er caa yn Chiarn: bee dunnal, as nee eh gerjaghey dty chree, as cur uss dty hreishteil ayns y Chiarn.