Psalmyn 25 - Lioar ny Psalmyn 1765 (Pointed)

PSAL. 25. Ad te, Domine, levavi.

¹ Hoods, O Hiarn, trogg-ym seose m’annym; my Yee, ta mee er choyrt my hreishteil ayn-yd: O ny lhig dooys ’ve er my choyrt gys nearey, cha-moo lhig da my noidyn ve boggyssagh harrym.

² Son cha bee veg jeusyn ooilley ta treishteil ayn-yds er nyn naaraghey: agh bee nyn lheid as ta girree-magh gyn oyr er nyn ghoyrt bun-ry-skyn.

³ Jeeagh dou dty raad, O Hiarn: as ynsee dou dty chassanyn.

⁴ Leeid mish ayns dt’irriney, as ynsee mee: son uss Jee my haualtys; ayn-yd va my hreishteil fey-ny-laa.

⁵ Tayrn gys cooinaghtyn, O Hiarn, dty vyghinyn meigh: as dty chenjallys-ghraihagh, t’er ny ve er dy-rieau.

⁶ O ny cooinee er peccaghyn as loghtyn my aegid: agh cordail rish dty vyghin smooinee orrym, O Hiarn, er graih dty vieys.

⁷ Graysoil as cairal ta’n Chiarn: shen-y-fa ynsee eh da peccee yn raad cair.

⁸ Adsyn ta imlee nee eh leeideil ayns briwnys: as dauesyn ta meen, ynsee eh e raad.

⁹ Ta ooilley raaidyn y Chiarn myghin as firrinys: da lheid as ta freaylley e chonaant as e leighyn.

¹⁰ Er graih dt’Ennym, O Hiarn: bee myghinagh da my pheccah, son te mooar.

¹¹ Cre’n dooinney ta goaill aggle roish y Chiarn: eshyn nee eh leeideil ayns y raad lhisagh eh ’reih.

¹² Bee’n annym echey ec aash: as yiow e lhuight yn cheer ayns eiraght.

¹³ Ta folliaght y Chiarn nyn mast’ ocsyn ta goaill aggle roïsh: as nee eh soilshaghey daue e chonaant.

¹⁴ Ta my hooillyn dy-bragh jeeaghyn gys y Chiarn: son tayrnee eh my chassyn ass y ribbeh.

¹⁵ Chyndaa oo hene hym’s, as jean myghin orrym: son ta mee treigit as ayns treihys.

¹⁶ Ta trimshey my chree er ny vishaghey: O cur uss lhiat mee ass my heaghyn.

¹⁷ Jeeagh er my arkys as my hreihys: as leih dou ooilley my pheccah.

¹⁸ Jeeagh er my noidyn kys t’ad er mishaghey: as t’ad gymmyrkey goanlys tranlaasagh m’oï.

¹⁹ O freill m’annym, as livrey mee: ny lhig dou v’er my choyrt gys nearey, son ayn-yds ta mee er choyrt my hreishteil.

²⁰ Lhig da ônid as dellal yeeragh goll mârym: son ta my hreishteil er ny ve ayn-yds.

²¹ Livrey Israel, O Yee: veih ooilley e heaghyn.