Psalmyn 23 - Lioar ny Psalmyn 1765 (Pointed)PSAL. 23. Dominus regit me. 1 She’n Chiarn my vochilley: shen-y-fa cha bee’m feme nhee erbee. 2 Nee eh faassaghey mee ayns pastyr glass: as m'y leeideil magh rish ny hushtaghyn dy ooraghey. 3 Nee eh m’annym y hyndaa: as m'y choyrt lesh magh ayns ny cassanyn dy chairys er graih e Ennym. 4 Dy-jarroo, ga dy vel mee shooyll ayns coan scadoo yn vaaish, cha goym aggle roish olk erbee: son t’ow uss mârym; ta dty lhatt as dty lorg dy my gherjaghey. 5 Nee oo boayrd y yannoo aarloo roym ayns yn enish ocsyn ta er my heaghney: t’ow er ooïllaghey my chione, as bee my chappan laane. 6 Agh eiyree dty chenjallys-ghraihagh as dty vyghin orrym ooilley laghyn my vea: as nee’ms taaghey thie’n Chiarn son dy-bragh. |
maintained by the British and Foreign Bible Society
British & Foreign Bible Society