Psalmyn 22 - Lioar ny Psalmyn 1765 (Pointed)

EVENING PRAYER. PSAL. 22. Deus, Deus meus.

¹ My Yee, my Yee, jeeagh orrym; cre’n-fa t’ow er my hreigeil: as t’ow choud veih my lhaynt, as veih goan my accan?

² O my Yee, ta mee geam fey laa, agh cha vel oo cur clashtyn: as ooilley’n oie neesht cha vel mee goaill veg y fea.

³ As t’ow uss tannaghtyn casherick: O uss ooashley Israel.

⁴ Ren ny ayraghyn ain treishteil ayn-yds: hug ad nyn marrant ort, as ren oo ad y livrey.

⁵ Deïe ad orts, as hooar ad cooney: hug ad nyn marrant ort, as cha row ad er nyn ghoyrt mow.

⁶ Agh er my hon’s, she beishteig mee, as cha nee dooinney: eer craid gheiney, as oltooan y pobble.

⁷ Ta ooilley ny ta dy m’akin, gannidys orrym: t’ad sheeyney magh nyn meillyn, as craa nyn ghing, gra,

⁸ Hreisht eh ayns Jee, dy jinnagh eh eshyn y livrey: lhig da eh y livrey, my ta taitnys echey ayn.

⁹ Agh uss eh ren m'y ghoaill ass breïn my vayrey: v’ow my hreishteil tra va mee foast er keeagh my voïr.

¹⁰ Ta mee er ve fo dty chiarail er dyn traa ruggyr mee: uss my Yee eer veih breïn my vayrey.

¹¹ O ny treig mee, son ta seaghyn er-gerrey: as cha vel unnane dy chooney lhiam.

¹² Ta ymmodee dew er jeet mygeayrt-y-moom: ta terriu lajer Vasan er hoiaghey orrym er dagh cheu.

¹³ T’ad fosley nyn meeal orrym: myr lion jollyssagh buirroogh son spooilley.

¹⁴ Ta mee deayrtit magh myr ushtey, as ta ooilley my chraueyn ass ynnyd: ta my chree neesht ayns mean my chorp eer myr kere ta lheïe.

¹⁵ Ta my niart chyrmit seose myr peesh dy haagh-craie, as ta my hengey lhiantyn gys my ghruntyn: as ver uss lhiat mee gys joan y vaaish.

¹⁶ Son ta ymmodee moddee er jeet mygeayrt-y-moom: as ta coonceïl ny olkyssee cur nyn goyrle dy-cheïley m’oï.

¹⁷ Hoyll ad my laueyn as my chassyn: foddym ooilley my chraueyn y choontey: t’ad shassoo gindys as jeeaghyn orrym.

¹⁸ Rheinn ad my gharmadyn ny mast’ oc: as er my chooat hilg ad lottyn.

¹⁹ Agh ny bee uss foddey voym, O Hiarn: she uss my chemmyrk; jean siyr dy chooney lhiam.

²⁰ Livrey m’annym veih’n chliwe: as my ynrycan bioys veih pooar y voddey.

²¹ Saue mee veih beeall y lion: t’ow er my chlashtyn myrgeddin veih mastey earkyn ny unicornyn.

²² Nee’ms dt’Ennym y hoilshaghey da my vraaraghyn: ayns mean ny hagglish nee’m uss y voylley.

²³ O moylley-jee yn Chiarn, shiuish ta goaill aggle roïsh: cur-jee ard-voylley da, ooilley shiuish jeh sluight Yacob, as gow-jee aggle roïsh, ooilley shiuish sluight Israel.

²⁴ Son cha vel eh er hoiaghey beg jeh, ny er hreigeil stayd inshil y voght: cha vel eh er ollaghey e eddin veih, agh tra deïe eh er, hug eh clashtyn da.

²⁵ Hoods nee’m chebbal my voylley ayns sheshaght vooar ny nooghyn: my vreearraghyn nee’ms y chooilleeney ayns yn enish ocsyn ta goaill aggle roishyn.

²⁶ Nee ny boghtyn gee, as bee ad er nyn yannoo magh: adsyn ta shirrey lurg y Chiarn, moyllee ad eh; bee’n cree eu bio son dy-bragh,

²⁷ Nee ooilley ardjyn y thallooin cooinaghtyn orroo hene, as bee ad er nyn jyndaa gys y Chiarn: as ver ooilley kynneeyn ny ashoonyn ooashley kiongoyrt rish.

²⁸ Son lesh y Chiarn yn reeriaght: as she eshyn yn Kiannoort mastey yn pobble.

²⁹ Nee nyn lheid ocsyn ooilley ta berchagh er y thalloo: gee as ooashley ’choyrt.

³⁰ Nee adsyn ooilley ta er nyn injillaghey gys y joan [gys boghtynid] gliooney kiongoyrt rish: as cha vel dooinney erbee er vioghey e annym hene.

³¹ Nee my lhuight’s eshyn y hirveish: bee ad goit stiagh son sheeloghe da’n Chiarn.

³² Hig adsyn, as nee ny niaughyn soilshaghey magh e chairys: da pobble hig er y theihll, adsyn ta’n Chiarn er chroo.