Psalmyn 21 - Lioar ny Psalmyn 1765 (Pointed)

PSAL. 21. Domine, in virtute tua.

¹ Nee’n Ree boggey ’ghoaill ayns dty niart, O Hiarn: feer yennal vees eh jeh dty haualtys.

² T’ow er choyrt da yeearree e chree: as cha vel oo er n’obbal da aghin e veillyn.

³ Son ver oo dasyn ro-laue bannaghtyn dy vieys: as soiaghey attey dy airh ghlen er e chione.

⁴ Hirr eh bea orts, as hug oo da bea liauyr: dy-jarroo son dy-bragh as dy-bragh.

⁵ Ta’n onnor echey mooar liorish dty haualtys: gloyr as ooashley vooar ver oo ersyn.

⁶ Son ver uss dasyn maynrys dy-bragh farraghtyn: as nee oo eh gennal lesh boggey dt’eddin.

⁷ As cre’n-fa? son dy vel y Ree coyrt e hreishteil ayns y Chiarn: as ayns myghin yn Er smoo syrjey cha bee eh er ny scughey.

⁸ Nee ooilley dty noidyn gennaghtyn dty laue: yiow dty laue yesh adsyn magh ta dwoaie oc ort.

⁹ Nee oo ad y yannoo myr oghe ailagh ayns traa dty chorree: nee yn Chiarn ad y stroie ayns e yymmoose, as nee yn aile ad y choyrt mow.

¹⁰ Yn rass oc ver oo ass ny fraueyn jeh’n thalloo: as yn sluight oc veih mastey cloan gheiney.

¹¹ Son chiare ad olkys dt’oï: as ghow ad ayns laue lheid y saase as nagh jarg ad y chooilleeney.

¹² Shen-y-fa ver oo orroosyn cooyl y choyrt: as strengyn dty vhow nee oo aarloo noi’n eddin oc.

¹³ Bee uss, Hiarn, er dty hoiaghey seose ayns dty niart hene: myr shen nee mayd goaill arrane, as moylley ’choyrt da dty phooar.