Psalmyn 20 - Lioar ny Psalmyn 1765 (Pointed)

PSAL. 20. Exaudiat te, Dominus.

¹ Dy jean y Chiarn dty chlashtyn ayns y laa dy heaghyn: dy jean Ennym Jee Yacob dt’endeil.

² Dy der eh cooney hood veih’n ynnyd casherick: as dy jean eh dty niartaghey magh ass Sion.

³ Dy gooinee eh er ooilley dty hebballyn: as soiaghey jeh dty ourallyn losht.

⁴ Dy der eh dhyt yeearree dty chree: as ooilley dt’aigney ’chooilleeney.

⁵ Gow mayd boggey ayns dty haualtys, as barriaght y gheddyn ayns Ennym y Chiarn y Jee ain: dy gooilleen y Chiarn ooilley dty aghinyn.

⁶ Nish ta fys aym, dy vel y Chiarn cooney lesh e Er-ooïllit, as dy der eh clashtyn da veih e niau chasherick: dy-jarroo lesh troshid slayntoil e laue yesh.

⁷ Ta paart coyrt nyn marrant gys fainaghyn, as paart gys cabbil: agh nee shinyn cooinaghtyn er Ennym y Chiarn y Jee ain.

⁸ T’adsyn er nyn goyrt fo-chosh, as er duittym: agh ta shinyn er droggal, as shassoo dy-shickyr.

⁹ Saue shin, Hiarn, as clasht rooin, O Ree flaunys: tra ta shin geamagh ort.