Psalmyn 18 - Lioar ny Psalmyn 1765 (Pointed)

EVENING PRAYER. PSAL. 18. Diligam te, Domine.

¹ Ver-yms graih dhyt, O Hiarn, my niart; she’n Chiarn my chregg lajer, as m’endeilys: my Haualtagh, my Yee, as my hroshid, huggey ver-ym barrant; my eïlley-caggee, ynnyd-lajer myrgeddin my hauchys, as my chemmyrk.

² Nee’ms geamagh er y Chiarn, ta feeu dy ve er ny voylley: myr shen bee’m sauchey veih my noidyn.

³ Haink angaishyn y vaaish mygeayrt-y-moom: as ren ny thooillaghyn dy vee-chraueeaght m'y agglaghey.

⁴ Haink pianyn niurin mygeayrt-y-moom: ren ribbaghyn y vaaish berraghtyn orrym.

⁵ Ayns my heaghyn nee’m geamagh er y Chiarn: as jannoo accan gys my Yee.

⁶ Myr shen clynnee eh my choraa veih e hiamble chasherick: as hig my phlaynt kiongoyrt rish, hed eh stiagh dy-jarroo gys e chleayshyn.

⁷ Va’n thalloo er ny ghleashagh, as ren eh craa: va eer undinyn ny sleïtyn neesht er-creau, as v’ad er ny scughey, ec e yymmoose.

⁸ Hie jaagh veih e enish: as aile va cur mow ass e veeal, myr shen dy row smarageyn er nyn voadey lesh.

⁹ Chromm eh ny niaughyn neesht, as haink eh neose: as ve dorraghey fo e chassyn.

¹⁰ Varkee eh er ny Cherubimyn, as ren eh getlagh: haink eh getlagh er skainyn ny geayee.

¹¹ Ren eh dorraghys e ynnyd follit: e chabbane-reeoil mygeayrt-y-mysh lesh ushtey dorraghey, as bodjallyn chiu dy choodaghey eh.

¹² Ec sollyssid e enish ren e vodjallyn scughey: claghyn-sniaghtee, as smarageyn d’aile.

¹³ Hug y Chiarn neesht taarnagh veih niau, as ren y Fer-syrjey coyrt e haarnagh: claghyn-sniaghtee, as smarageyn d’aile.

¹⁴ Lhig eh magh e hideyn, as skeayll eh ad: hug eh magh e hendeilyn, as ren eh ad [y] stroie.

¹⁵ Va ny farraneyn ushtey er nyn vakin, as haink undinyn y theihll rish, lesh dty oghsan, O Hiarn: ec sheidey ennal dty yymmoose.

¹⁶ Ver eh fyss veih’n yrjid dy my hauail: as nee eh m'y ghoaill ass ymmodee ushtaghyn.

¹⁷ Nee eh m'y livrey veih my noidyn stroshey, as vowesyn ta dwoaie oc orrym: son t’ad ro lajer er my hon.

¹⁸ Haink ad orrym gyn-yss ayns my heaghyn: agh y Chiarn ren m'y chummal seose.

¹⁹ Hug eh lesh mee magh neesht gys boayl dy reamys: hug eh lesh mee magh, dy-jarroo son dy row foayr echey dou.

²⁰ Nee’n Chiarn m'y chooilleeney lurg my ghellal cairagh: cordail rish glennid my laueyn nee eh lhiasaghey dou;

²¹ Er son dy vel mee er vreayll raaidyn y Chiarn: as nagh vel mee er hreigeil my Yee, myr ta ny mee-chrauee dy yannoo.

²² Son ta sooill aym gys ooilley e leighyn: as cha dilg-ym e annaghyn voym.

²³ Va mish kinjagh gyn loght kiongoyrt rishyn: as hug mee cooyl rish m’olkys hene.

²⁴ Shen-y-fa nee’n Chiarn m'y chooilleeney lurg my ghellal cairagh: as cordail rish glennid my laueyn ayns shilley e hooillyn.

²⁵ Da’n dooinney casherick nee oo soilshaghey oo hene dy ve (dty Yee) casherick: as da’n dooinney ynrick vees oo ynrick.

²⁶ Dasyn ta glen nee oo soilshaghey oo hene glen: as noi’n roonagh soilshee oo dty roon.

²⁷ Nee oo sauail y sleih ta ayns seaghyn: as ver oo sheese shillaghyn ard ny mooaralee.

²⁸ Nee oo myrgeddin my chainle y oaddey: ver y Chiarn my Yee er my ghorraghys dy ve soilshey.

²⁹ Son liorts ver-ym fo-chosh sheshaght-caggee dy gheiney: as lesh cooney my Yee lheim-ym harrish y voall.

³⁰ Ta raad Yee raad rea: ta goo yn Chiarn neesht er ny phrowal ’syn aile; eh yn fendeilagh ocsyn ooilley ta coyrt nyn dreishteil aynsyn.

³¹ Son quoi ta Jee, agh y Chiarn! ny quoi echey ta niart erbee, agh ec y Jee ain?

³² She Jee ta dy my eïllaghey lesh niart caggee: as ta jannoo my raad jeeragh.

³³ T’eh jannoo my chassyn myr cassyn feeaïh: as soiaghey mee seose dy-ard.

³⁴ T’eh gynsaghey my laueyn dy chaggey: nee my roihaghyn brishey eer bow steïllyn.

³⁵ T’ow er choyrt dooys fendeilys dy haualtys: nee dty laue yesh neesht m'y chummal seose, as nee dty smaght graihagh mish y yannoo mooar.

³⁶ Nee oo raad liane dy-liooar foym dy immeeaght: nagh skyrr my chesmadyn.

³⁷ Eiyr-ym er my noidyn as berr-ym orroo: cha-moo nee’m chyndaa reesht derrey vee’m er stroie ad.

³⁸ Bwoail-ym ad, derrey nagh vod ad shassoo: agh tuittym fo my chassyn.

³⁹ T’ow er my chomm'rey lesh niart son y chaggey: nee uss my noidyn y lhieggal sheese foym.

⁴⁰ T’ow er choyrt er my noidyn neesht dy chur cooyl rhym: as nee’ms adsyn y stroie ta dwoaie oc orrym.

⁴¹ Nee ad geamagh, agh cha bee unnane dy chooney lhieu: dy-jarroo gys y Chiarn, nee ad geamagh, agh cha der eh clashtyn daue.

⁴² Bwoail-yms ad cha meen as y joan roish y gheay: as tilg-ym ad magh myr y laagh ayns ny straaidyn.

⁴³ Nee uss m'y livrey veih anvea yn pobble: as ver oo orrym dy ve kione ny ashoonyn.

⁴⁴ Pobble nagh nione dooys: nee m'y hirveish.

⁴⁵ Cha leah as chlynnys ad jee’m, ver ad biallys dou: agh nee’n chloan yoarree foalsaght rhym.

⁴⁶ Nee’n chloan yoarree failleil: as bee ad agglagh ayns ny ynnydyn follit oc.

⁴⁷ Ta’n Chiarn bio, as bannit dy row m’er-coonee niartal: as moylley dy row gys Jee my haualtys;

⁴⁸ Yn Jee hene ta fakin dy goym cooilleeney: as ta coyrt yn pobble fo my smaght.

⁴⁹ Eshyn eh ta dy my livrey veih my noidyn dewil, as ta dy my hoiaghey seose er nyn skyn ocsyn ta shassoo m’oï: nee oo m'y livrey veih’n dooinney olkyssagh.

⁵⁰ Son yn oyr shoh ver-yms booise dhyt, O Hiarn, mastey ny Ashoonyn: as goym arraneyn-moyllee gys dt’Ennym.

⁵¹ Barriaght vooar t’eh coyrt da e Ree: as soilshaghey kenjallys-ghraihagh da David e Er-ooïllit, as gys e lhuight er son dy-bragh.