Psalmyn 149 - Lioar ny Psalmyn 1765 (Pointed)

PSAL. 149. Cantate Domino.

¹ O gow-jee arrane noa gys y Chiarn: lhig da agglish ny nooghyn eshyn y voylley.

² Lhig da Israel boggey ’ghoaill aynsyn ren eh y chroo: as lhig da cloan Sion ’ve gennal ayns nyn Ree.

³ Lhig daue moylley yn Ennym echey ayns y daunsin: lhig daue arraneyn-moyllee ’ghoaill huggey lesh tabret as y chlaasagh;

⁴ Son ta taitnys ec y Chiarn ayns e phobble: as t’eh cooney lhieusyn ta jeh cree imlee.

⁵ Lhig da ny nooghyn ’ve gennal dy gloyroil: lhig daue boggey ’ghoaill er nyn lhiabbaghyn.

⁶ Lhig da arraneyn-moyllee Yee ’ve ayns nyn meeall: as cliwe dy ghaa-foyr ayns nyn laue;

⁷ Dy ghoaill cooilleeney er ny ashoonee: as dy cherraghey yn pobble;

⁸ Dy chiangley ny reeaghyn oc ayns geulaghyn: as ny deiney ooasle oc lesh driaghtyn yiarn;

⁹ Dy ghoaill cooilleeney orroo, myr te scruit: Lheid yn ooashley t’ec ooilley e nooghyn.