Psalmyn 148 - Lioar ny Psalmyn 1765 (Pointed)

PSAL. 148. Laudate Dominum.

¹ O moylley-jee Chiarn niau: moylley-jee eh ayns yn yrjid.

² Moylley-jee eh, ooilley shiuish e ainleyn: moylley-jee eh shiuish e heshaghtyn-caggee.

³ Moylley-jee eh, ghrian as eayst: moylley-jee eh, ooilley shiuish rollaagyn as soilshey.

⁴ Moylley-jee eh, ooilley shiuish niaughyn: as shiuish ushtaghyn ta er-skyn yn aer.

⁵ Lhig daue Ennym y Chiarn y voylley: son loayr eh yn fockle, as v’ad jeant; doardee eh, as v’ad er nyn groo.

⁶ T’eh er n’yannoo ad shickyr son dy-bragh as dy-bragh: t’eh er choyrt daue leigh nagh bee er ny vrishey.

⁷ Moylley-jee yn Chiarn er y thalloo: shiuish whaleyn, as ooilley ny ynnydyn dowin.

⁸ Aile as sniaghtey garroo, sniaghtey meen as keay: geay as sterrym, cooilleeney e ghoo;

⁹ Sleïtyn as dy-chooilley chronk: biljyn messoil, as dy-chooilley villey cedar;

¹⁰ Beïyn as maase jeh dy-chooilley cheint: cretooryn snaauee as eeanlee skainagh;

¹¹ Reeaghyn y thallooin, as dy-chooilley phobble: prinsyn as ooilley briwnyn y theihll;

¹² Deiney aegey as moidynyn, shenn gheiney as paitchyn, moylley-jee Ennym y Chiarn: son ta’n Ennym echeysyn ny-lomarcan ooasle, as e ghloyr er-skyn niau as thalloo.

¹³ Troggee eshyn seose dy ard niart e phobble; nee ooilley e nooghyn eshyn y voylley: dy-feer cloan Israel, dy-jarroo yn pobble ta dy hirveish eh.