Psalmyn 147 - Lioar ny Psalmyn 1765 (Pointed)

EVENING PRAYER. PSAL. 147. Laudate Dominum.

¹ O moylley-jee yn Chiarn; son s’mie te dy ghoaill arraneyn-moyllee gys y Jee ain: dy-jarroo, s’eunyssagh as gerjoilagh te dy ve booisal.

² Ta’n Chiarn troggal seose Jerusalem: as chaglym cooidjagh kynneeyn skeaylt Israel.

³ T’eh dy lheihys adsyn ta brisht ayns cree: as coyrt medshin dy laanaghey ny doghanyn oc.

⁴ T’eh coontey earroo ny rollaagyn: as ta ennym echey er dagh unnane oc.

⁵ S’mooar ta’n Chiarn ainyn, as s’mooar ta e phooar: dy-jarroo, ta e chreenaght er-skyn earroo.

⁶ Ta’n Chiarn soiaghey seose yn vooinjer imlee: as coyrt sheese ny mee-chrauee kiart rish y thalloo.

⁷ O gow-jee arraneyn-moyllee gys y Chiarn lesh toyrt-booise: gow-jee arraneyn-moyllee er y chlaasagh gys y Jee ain;

⁸ Ta coodaghey yn aer lesh bodjallyn, as jannoo aarloo yn fliaghey son y thalloo: ta coyrt er y faiyr dy aase er ny sleïtyn, as lossyreeyn son ymmyd deiney;

⁹ Ta coyrt foddyr da’n maase: as beaghey ny fee aegey ta geamagh huggey.

¹⁰ Cha vel eshyn soiaghey jeh troshid cabbyl: cha-moo ta geill echey da cassyn y choshee bieau;

¹¹ Agh ta taitnys ec y Chiarn ayndoosyn ta goaill aggle roïsh: as ta coyrt nyn dreishteil ayns e vyghin.

¹² Cur moylley da’n Chiarn, O Yerusalem: cur moylley da dty Yee, O Sion;

¹³ Son t’eh er n’yannoo shickyr boltyn dty yiattyn: as er vannaghey dty chloan er cheu-sthie jeed.

¹⁴ T’eh jannoo shee ayns dty ardjyn: as dy dty yannoo magh lesh floor curnaght.

¹⁵ T’eh coyrt magh e haarey er y thalloo: as ta e ghoo roih feer leah.

¹⁶ T’eh tilgey sniaghtey myr ollan: as skeayley yn lieh-rio myr leoaie.

¹⁷ T’eh ceau magh e rio ayns sheebaneyn: quoi ta abyl dy hurranse y feayraght echey?

¹⁸ T’eh coyrt magh e ghoo, as dy hennue ad: t’eh sheidey lesh e gheay, as ta ny hushtaghyn roih.

¹⁹ Hoilshee eh e ghoo da Jacob: e ’lattyssyn as e oardaghyn da Israel.

²⁰ Cha vel eh er ghellal myr shoh rish ashoon erbee elley: cha-moo t’ec ny ashoonee tushtey jeh e leighyn.