Psalmyn 145 - Lioar ny Psalmyn 1765 (Pointed)

PSAL. 145. Exaltabo te, Deus.

¹ Ver-yms ard-voylley dhyt, O Yee my Ree: as nee’ms dty Ennym y vannaghey son dy-bragh as dy-bragh.

² Dy chooilley laa ver-ym booise dhyt: as dt’Ennym y ghloyraghey son dy-bragh as dy-bragh.

³ S’mooar ta’n Chiarn, as yindyssagh, feeu dy v’er ny voylley: ta’n mooadys echey er-skyn roshtyn nyn dushtey.

⁴ Nee un sheeloghe dt’obbraghyn y voylley gys sheeloghe elley: as soilshee ad magh dty niart.

⁵ Er my hons, loayr-ym jeh dt’ooashley: dty ghloyr, dty voylley, as dt’obbraghyn yindyssagh;

⁶ Myr shen dy jean sleih loayrt jeh niart dt’obbraghyn yindyssagh: as nee’ms myrgeddin fockley magh dty vooadys.

⁷ Bee imraa er ny yannoo jeh ymmodee dty chenjallys: as gow-ee sleih arraneyn jeh dty chairys.

⁸ Ta’n Chiarn graysoil as myghinagh: jeh surranse-foddey, as mieys vooar.

⁹ Ta’n Chiarn dooie da dy-chooilley ghooinney: as ta e vyghin harrish ooilley e obbraghyn.

¹⁰ Ta ooilley dt’obbraghyn dy dty voylley, O Hiarn: as ta dty nooghyn cur booise dhyt.

¹¹ T’ad soilshaghey gloyr dty reeriaght: as loayrt jeh dty phooar;

¹² Dy vod dty phooar, dty ghloyr, as niart dty reeriaght: v’er ny hoilshaghey da deiney.

¹³ Ta’n reeriaght ayds reeriaght dy-bragh farraghtyn: as ta dty ard-reill er-mayrn trooid dy-chooilley heeloghe.

¹⁴ Ta’n Chiarn niartaghey lhieusyn ooilley ta aarloo dy huittym: as troggal seose adsyn ooilley ta ny lhie fo’n errey.

¹⁵ Ta sooillyn dy-chooilley chretoor farkiaght orts, O Hiarn: as t’ow coyrt daue nyn meaghey ayns imbagh cooie.

¹⁶ T’ow fosley dty laue: as lhieeney dy-chooilley nhee bio lesh palchey.

¹⁷ Ta’n Chiarn cairagh ayns ooilley e raaidyn: as casherick ayns ooilley e obbraghyn.

¹⁸ Ta’n Chiarn er-gerrey dauesyn ooilley ta geamagh er: dy-jarroo, dauesyn ooilley ta geamagh er ayns ynrickys.

¹⁹ Cooilleenee eshyn yn yeearree ocsyn ta goaill aggle roïsh: clynnee eh myrgeddin yn eam oc, as cooinee eh lhieu.

²⁰ Ta’n Chiarn coadey adsyn ooilley ta graihagh er: agh skeayley dy-lhean ooilley ny mee-chrauee.

²¹ Loayr-ee my veeall jeh moylley’n Chiarn: as lhig da dy-chooilley chretoor booise y choyrt da’n Ennym casherick echey son dy-bragh as dy-bragh.