Psalmyn 143 - Lioar ny Psalmyn 1765 (Pointed)

PSAL. 143. Domine, exaudi.

¹ Eaisht rish my phadjer, O Hiarn, as cur geill da my yeearree: cur clashtyn dou er graih dty ynrickys as dty chairys;

² As ny gow er dty hoshiaght gys briwnys rish dty harvaant: son ayns dty hilley’s cha bee dooinney erbee bio er ny heyrey.

³ Son ta’n noid er n’yannoo tranlaase er m’annym; t’eh er woalley sheese my vioys gys y thalloo: t’eh er m’eiyrt gys y dorraghys, goll roosyn ta er ve foddey marroo.

⁴ Shen-y-fa ta my spyrryd seaghnit ayn-ym: as ta my chree brisht cheu-sthie jee’m.

⁵ Agh foast ta mee cooinaghtyn er y traa t’er n’gholl shiaghey; ta mee smooinaghtyn dy-dowin er ooilley dty obbraghyn: ta mee dy-jarroo baarail mee hene ayns obbraghyn dty laueyn.

⁶ Ta mee sheeyney magh my laueyn hoods: ta m’annym mennuigh er dty hon myr thalloo sponkit.

⁷ Eaisht rhym, O Hiarn, as shen dy-leah, son ta my spyrryd gannooinaghey: ny follee voym dt’eddin, nagh bee’m casley roosyn ta goll sheese ayns yn oaie.

⁸ O lhig dou clashtyn dty chenjallys-ghraihagh leah ’sy voghrey, son ayn-yds ta my hreishteil: jeeagh dou yn raad ayn lhisin gimmeeaght, son hoods ta mee troggal seose m’annym.

⁹ Livrey mee, O Hiarn, veih my noidyn: son hoods ta mee chea dy my choadey.

¹⁰ Ynsee dou dy yannoo dt’aigney, son she uss my Yee: lhig da dty Spyrryd graihagh mish y leeideil gys y cheer dy chairys.

¹¹ Niartee lhiam, O Hiarn, er graih dt’Ennym: as er graih dty ynrickys, jean m’annym y reaghey ass seaghyn.

¹² As jeh dty vieys giare sheese my noidyn: as stroie adsyn ooilley ta jannoo tranlaase er m’annym, son mish dty harvaant.