Psalmyn 141 - Lioar ny Psalmyn 1765 (Pointed)

PSAL. 141. Domine, clamavi.

¹ Hiarn, ta mee geamagh ort, jean siyr hym: as cur geill da my choraa, tra ta mee jannoo m’accan hood.

² Lhig da my phadjer v’er ny hebbal ayns dt’enish myr yn incense: as lhig da troggal seose my laueyn ’ve myr oural yn astyr.

³ Soie arrey, O Hiarn, roish my veeall: as freill dorrys my veillyn.

⁴ O ny lhig da my chree ve er ny loobey gys drogh obbyr erbee: ny lhig dou raad y choyrt dou hene ayns cliaghtaghyn mee-chrauee, mâroosyn ta gobbraghey olk; er aggle dy goym commee jeh ny t’ad goaill taitnys ayn.

⁵ Ny-sleaie lhig da deiney mie m'y cherraghey ayns aigney mie: as oghsan y choyrt dou.

⁶ As bee shoh myr ooïll slayntoil, nagh brish my chione: nee’m padjer foast y ghoaill noi’n olkys oc.

⁷ Lhig da ny briwnyn oc cherraghtyn ayns ynnydyn claghagh: dy vod ad clashtyn my ghoan, son t’ad millish.

⁸ Ta ny craueyn ain ny lhie skeaylt er beeall yn oaie: ’naght myr ta fer brishey as scoltey feiyh er y thalloo.

⁹ Agh ta my hooillyn jeeaghyn hoods, O Hiarn Yee: ayn-yds ta my hreishteil, O ny jean m’annym y hreigeil.

¹⁰ Freill mee veih’n ribbeh t’ad er hoiaghey er my hon: as voish geulaghyn ny drogh-yantee.

¹¹ Lhig da ny mee-chrauee tuittym lesh-y-chielley ayns ny ribbaghyn oc hene: as lhig dooys dy-bragh ad y haghney.