Psalmyn 140 - Lioar ny Psalmyn 1765 (Pointed)

PSAL. 140. Eripe me, Domine.

¹ Livrey mee, O Hiarn, veih’n drogh ghooinney: as freill mee veih’n dooinney dewil;

² Ta smooinaghtyn er olk ayns nyn greeaghyn: as dy-kinjagh greesaghey seose anvea.

³ T’ad er slhieu nyn jengaghyn myr ard-nieu: ta pyshoon yn adder fo nyn meillyn.

⁴ Freill mee, O Hiarn, veih laueyn ny mee-chrauee: jean m'y choadey veih ny tranlaasee, ta kiarit dy my hilgey harrish ayns my raaidyn.

⁵ Ta ny mooaralee er hoiaghey ribbeh er my hon, as er skeayley magh lieen dy-lhean lesh coyrdyn: dy-jarroo t’ad er hoiaghey trappyn ayns my raad.

⁶ Dooyrt mee rish y Chiarn, She uss my Yee: eaisht rish coraa my phadjeryn, O Hiarn.

⁷ O Hiarn Yee, uss niart my ’lhaynt: t’ow er choodaghey my chione ayns laa yn chaggey.

⁸ Ny lhig da’n dooinney mee-chrauee cooilleen-aigney ’gheddyn orrym, O Hiarn: ny lhig da ny saaseyn aggairagh echey goaill toshiaght, nagh bee ad ro voyrnagh.

⁹ Lhig da olkys nyn meillyn hene tuittym er y chione ocsyn: ta dy my hionney stiagh er dy-chooilley cheu.

¹⁰ Lhig da smaraagyn jiarg losht tuittym orroo: lhig daue ve tilgit ayns yn aile, as ayns ny ooigyn dowiney, nagh nirree ad reesht dy-bragh.

¹¹ Cha jig y feanish foalsey er y hoshiaght er y thalloo: nee olk yn dooinney tranlaasagh y helg gys e hoyrt-mow.

¹² Shickyr ta mee dy jean y Chiarn cooilleeney ’ghoaill ayns lieh’n voght: as dy gum eh seose cooish yn ymmyrchagh.

¹³ Ver y dooinney ynrick myrgeddin booise da dt’Ennym: as nee’n er-cairagh tannaghtyn ayns dty hilley.