Psalmyn 14 - Lioar ny Psalmyn 1765 (Pointed)

PSAL. 14. Dixit insipiens.

¹ Ta’n ommydan er ghra ayns e chree: Cha vel Jee erbee.

² T’ad er jeet dy ve feer vee-chrauee, as dwoaiagh ayns nyn yannoo: cha vel unnane erbee ta jannoo dy-mie, cha vel unnane.

³ Yeeagh y Chiarn neose veih niau er cloan gheiney: dy akin row veg jeu yinnagh toiggal, as shirrey lurg Jee.

⁴ Agh t’ad ooilley er gholl magh ass y raad, t’ad ooilley-cooidjagh er jeet dy ve feohdoil: cha vel unnane ta jannoo dy-mie, cha vel eer unnane.

⁵ Ta’n scoarnagh oc oaie foshlit; lesh nyn jengey t’ad er volley: ta pyshoon ard-nieughyn fo nyn meillyn.

⁶ Ta’n beeal oc laane dy ghweeaghyn as dy herriuid: ta ny cassyn oc tappee dy gheayrtey fuill.

⁷ Ta toyrt-mow as mee-vaynrys ayns nyn raaidyn, as raad y chee cha bione daue: cha vel aggle erbee dy Yee roish nyn sooillyn.

⁸ Vel veg y tushtey oc, dy vel ad ooilley myr shoh cur rish olkys: gee seose my phobble myr arran, as cha vel ad geamagh er y Chiarn?

⁹ Shen y raad v’ad er nyn goyrt lhieu ayns aggle vooar, dy-jarroo raad nagh row veg yn aggle: son ta Jee ayns sheeloghe y sleih cairal.

¹⁰ Er nyn son euish, ta shiu er n’yannoo craid er coyrle y voght: er-yn-oyr dy vel eh coyrt e hreishteil ayns y Chiarn.

¹¹ Quoi ver Saualtys da Israel magh ass Sion? Tra ta’n Chiarn chyndaa cappeeys e phobble: eisht gowee Jacob boggey, as bee Israel gennal.