Psalmyn 139 - Lioar ny Psalmyn 1765 (Pointed)

MORNING PRAYER. PSAL. 139. Domine, probâsti.

¹ O Hiarn, t’ow er my ronsaghey magh, as er my hoiggal: shione dhyts my hoie-sheese, as my irree-seose; t’ow toiggal my smooinaghtyn foddey ro-laue.

² T’ow uss mygeayrt my chassan, as mygeayrt my lhiabbee: as fakin ooilley my raaidyn.

³ Son cur-my-ner, cha vel fockle er my hengey: nagh vel uss, O Hiarn, dy-slane toiggal.

⁴ T’ow uss er my chummey cheu-chooylloo, as cheu-veealloo: as er choyrt dty laue orrym.

⁵ Dy hoiggal shoh, te ro yindyssagh as ro ard er my hon: cha voddym roshtyn huggey.

⁶ C’raad eisht nee’m chea veih dty Spyrryd: ny c’raad nee’m cosney veih dt’enish?

⁷ My hem seose gys niau, t’ow ayns shen: my hem sheese gys niurin, t’ow ayns shen myrgeddin.

⁸ My ghoym skainyn y voghrey: as tannaghtyn ayns ny ardjyn sodjey magh d’yn aarkey;

⁹ Dy-jarroo ayns shen myrgeddin nee dty laue m'y leeideil: as nee dty laue yesh m'y niartaghey.

¹⁰ My jirr-ym, Foddee dy jean y dorraghys m'y choodaghey: eisht bee m’oie er ny hyndaa gys soilshey yn laa.

¹¹ Dy-jarroo, cha vel y dorraghys dorraghey mârts, agh ta’n oie cha sollys as y laa: ta’n dorraghys as y soilshey dhyts co-laik.

¹² Son lhiats my challin: t’ow er my choodaghey ayns breïn my vayrey.

¹³ Ver-ym booise dhyt, son ta mee dy-atchimagh as dy-yindyssagh er my chroo: mirrillagh ta dt’obbraghyn, as s’mie ta m’annym’s dy hoiggal shen.

¹⁴ Cha vel my chraueyn er ny cheiltyn voïds: ga dy row mee jeant dy-follit, as er my chummey heese er y thalloo.

¹⁵ Honnick dty hooillyn yn stoo ayms, tra ve foast gyn cummey: as ayns dty lioar va ooilley my oltyn scruit;

¹⁶ Va laa lurg laa er nyn gummey: tra nagh row ad foast er jeet rish.

¹⁷ O cre cha deyr ta dty choyrlyn dooys, O Yee: O cre wheesh ta’n symm oc!

¹⁸ My hem dy choontey ad, t’ad ny smoo ayns earroo n’yn gheinnagh: tra ta mee doostey ass my chadley, ta mee ayns dt’enish.

¹⁹ Nagh jean oo stroie ny drogh-yantee, O Yee: immee-jee ass m’enish, shiuish gheiney foalley.

²⁰ Son t’ad loayrt dy-mee-chairagh dt’oï: as ta dty noidyn goaill dt’Ennym ayns fardail.

²¹ Nagh vel dwoaie aym orroosyn, O Hiarn, ta dwoaie oc orts: as nagh vel mee corree roosyn ta girree magh dt’oï?

²² Dy-jarroo ta slane dwoaie aym orroo: myr dy beagh ad my eer noidyn.

²³ Prow mee, O Yee, as ronsee grunt my chree: jean m'y hirrey magh, as feysht my smooinaghtyn.

²⁴ Jeeagh my ta mee ayns raad erbee dy olkys: as leeid mee gys raad yn vea dy-bragh farraghtyn.