Psalmyn 138 - Lioar ny Psalmyn 1765 (Pointed)

PSAL. 138. Confitebor tibi.

¹ Ver-ym booise dhyt, O Hiarn, lesh ooilley my chree: dy-jarroo fenish ny ainleyn goym arraneyn-moyllee hoods.

² Nee’m ooashley ’choyrt kiongoyrt rish dty hiamble casherick, as dt’Ennym y voylley, er coontey dty chenjallys-ghraihagh as dt’ynrickys: son t’ow er ghloyraghey dt’Ennym as dty Ghoo er-skyn dy-chooilley nhee.

³ Tra deïe mee ort, ren oo m'y chlashtyn: as m’annym y chomm'rey lesh mooarane niart.

⁴ Nee ooilley reeaghyn y thallooin uss y voylley, O Hiarn: son t’ad er chlashtyn goan dty veeall;

⁵ Dy-jarroo, gow-ee ad arraneyn ayns raaidyn y Chiarn: Dy vel gloyr y Chiarn mooar.

⁶ Son ga dy vel y Chiarn ard, ny-yeih t’eh coyrt tastey da’n sleih imlee: agh er son ny mooaralee t’eh jeeaghyn orroo foddey veih.

⁷ Ga dy vel mee shooyll ayns mean seaghyn, ny-yeih nee oo m'y ooraghey: sheeyn-ee oo magh dty laue er eulys my noidyn, as nee dty laue yesh mish y hauail.

⁸ Nee’n Chiarn e chenjallys-ghraihagh y yannoo mie dooys: ta dty vyghin, O Hiarn, farraghtyn son dy-bragh; ny jean beg y hoiaghey eisht jeh obbyr dty laueyn hene.