Psalmyn 137 - Lioar ny Psalmyn 1765 (Pointed)PSAL. 137. Super flumina. 1 Liorish awinyn Vabylon hoie shin sheese as cheayn shin: tra ren shin smooinaghtyn orts, O Sion. 2 Er son ny claasaghyn ain, chrogh shin ad seose: er ny biljyn ta ayns shen. 3 Son adsyn ren shin y leeideil ayns cappeeys, hirr ad orrin arrane, as bingys ayns nyn drimshey: Gow-jee dooin unnane dy arraneyn Sion. 4 Kys oddys mayd arrane y Chiarn y ghoaill: ayns cheer yoarree? 5 My yarrood-yms uss O Yerusalem: lhig da my laue yesh jarrood e slheïe. 6 Mannagh gooin-yms orts, lhig da my hengey lhiantyn gys clea my veeall: dy-jarroo, mannagh vel mee soiaghey jeh Jerusalem er-skyn dy-chooilley voggey elley. 7 Cooinee er cloan Edom, O Hiarn, ayns laa Yerusalem: kys dooyrt ad, Sheese lesh, sheese lesh, corrym rish y thalloo. 8 O inneen Vabylon, kiarit son toyrt-mow: s’maynrey vees y dooinney nee uss y chooilleeney myr t’ow er hirveish shinyn. 9 Bannit vees eshyn ghoys dty chloan: as hilgys ad noi ny claghyn. |
maintained by the British and Foreign Bible Society
British & Foreign Bible Society