Psalmyn 135 - Lioar ny Psalmyn 1765 (Pointed)

PSAL. 135. Laudate nomen.

¹ O moylley-jee yn Chiarn, cur-jee ard-voylley da Ennym y Chiarn: jean-jee eh y voylley, O shiuish shirveishee yn Chiarn;

² Shiuish ta shassoo ayns thie yn Chiarn: ayns cooyrtyn thie yn Jee ain.

³ O moylley-jee yn Chiarn, son ta’n Chiarn graysoil: O trogg-jee arraneyn-moyllee gys yn Ennym echey, son te eunyssagh.

⁴ As cre’n-oyr? ta’n Chiarn er reih Jacob da hene: as Israel son e eiraght hene.

⁵ Son ta fys aym dy vel y Chiarn mooar: as dy vel y Chiarn ainyn er-skyn dy-chooilley yee.

⁶ Cre-erbee s’gooidsave lesh y Chiarn, shen ren eh ayns niau, as er y thalloo: ayns yn aarkey, as ayns ooilley ny diunidyn mooarey.

⁷ T’eh cur magh ny bodjallyn veih ardjyn sodjey magh y theihll: as cur magh ny tendeilyn-taarnee lesh y fliaghey, tayrn ny geayghyn magh ass e hashtaghyn.

⁸ Woaill eh yn chied er-ny-ruggey ayns cheer Egypt: chammah dy gheiney as maase.

⁹ T’eh er hoilshaghey cowraghyn as yindyssyn ayns y vean ayds, O heer Egypt: er Pharaoh as ooilley e vooinjer.

¹⁰ Woaill eh ymmodee ashoonyn: as stroie eh reeaghyn niartal;

¹¹ Sehon ree ny Amoriteyn, as Og ree Vasan: as ooilley reeriaghtyn Chanaan;

¹² As hug eh yn cheer oc dy ve son eiraght: dy-jarroo son eiraght da Israel e phobble.

¹³ Ta dt’Ennym, O Hiarn, farraghtyn son dy-bragh: as dty imraa myrgeddin, O Hiarn, veih sheeloghe gys sheeloghe.

¹⁴ Son gow-ee yn Chiarn cooilleeney son e phobble: as bee eh graysoil da e harvaantyn.

¹⁵ Er son jallooyn ny ashoonyn, cha vel ad agh argid as airh: obbyr laueyn deiney;

¹⁶ Ta beïll oc, as cha vel ad loayrt: ta sooillyn oc, agh cha vel ad fakin;

¹⁷ Ta cleayshyn oc, agh cha vel ad clashtyn: cha-moo ta veg yn ennal ayns nyn meeall.

¹⁸ T’adsyn ta jannoo ad casley roo: as myr shen t’adsyn ooilley ta cur nyn dreishteil ayndoo.

¹⁹ Moylley-jee yn Chiarn, shiuish hie Israel: moylley-jee yn Chiarn, shiuish hie Aaron.

²⁰ Moylley-jee yn Chiarn, shiuish hie Levi; shiuish ta goaill aggle roish y Chiarn, bannee-jee yn Chiarn.

²¹ Bannit dy row yn Chiarn veih Sion: ta vaghey ec Jerusalem.