Psalmyn 127 - Lioar ny Psalmyn 1765 (Pointed)

PSAL. 127. Nisi Dominus.

¹ Mannagh vel y Chiarn troggal y thie: ta’n obbyr oc ayns fardail ta dy hroggal eh.

² Mannagh vel y Chiarn freayll yn ard-valley: ta’n arreyder dooisht ayns fardail.

³ Cha vel eh agh obbyr callit dy vel shiu ayns siyr dy irree dy-moghey, as cha anmagh goaill fea, as gee yn arran dy imnea: son shen myr t’eh coyrt cadley dauesyn shynney lesh.

⁴ Cur-jee my-ner, cloan as mess y vrein: t’ad eiraght as gioot ta cheet veih’n Chiarn.

⁵ Myr ta ny sideyn ayns laue yn dooinney lajer: eer myr shen ta’n chloan aegey.

⁶ S’maynrey yn dooinney ta’n quhiver echey laane jeu: cha bee nearey orroo tra t’ad coyrt eddin da nyn noidyn ayns y yiatt.