Psalmyn 124 - Lioar ny Psalmyn 1765 (Pointed)

PSAL. 124. Nisi quia Dominus.

¹ Er-be dy row yn Chiarn hene er nyn lieh, foddee Israel nish gra: er-be dy row yn Chiarn hene er nyn lieh, tra dirree sleih seose nyn ’oï;

² Veagh ad er nyn sluggey sheese bio: tra v’ad cha eulyssagh ayns corree rooin.

³ Veagh ny hushtaghyn, dy-feer, er vaih shin: as veagh y thooilley er n’gholl harrish nyn annym.

⁴ Veagh ushtaghyn dowin ny mooaralee: er n’gholl eer harrish nyn anmeenyn.

⁵ Agh moylley dy row gys y Chiarn: nagh vel er livrey shin seose son spooilley da ny feeacklyn oc.

⁶ Ta’n annym ain er scapail, dy-jarroo myr ushag ass ribbeh yn shelgeyr: ta’n ribbeh er ny vrishey, as ta shin er nyn livrey.

⁷ Ta’n cooney ainyn shassoo ayns Ennym y Chiarn: ta er chroo niau as thalloo.