Psalmyn 12 - Lioar ny Psalmyn 1765 (Pointed)

EVENING PRAYER. PSAL. 12. Salvum me fac.

¹ Cooin lhiam, Hiarn, son cha vel un dooinney crauee faagit: son cha vel y vooinjer ynrick agh beggan mastey cloan gheiney.

² T’ad taggloo jeh fardail dagh unnane rish e naboo: cha vel ad agh brynnyraght lesh nyn meillyn, as jannoo molteyrys ayns nyn gree dooble.

³ Ver y Chiarn mow ooilley ny meillyn molteyragh: as y chengey ta loayrt goan mooaralagh;

⁴ Adsyn ta er ghra, Lesh nyn jengey yiow mayd barriaght: shin hene lhisagh loayrt; quoi ta ny hiarn harrin?

⁵ Nish er graih seaghyn vee-gherjoil ny ymmyrchee: as er son osnaghyn trommey ny boghtyn;

⁶ Trogg-ym orrym, ta’n Chiarn dy ghra: as ver-ym feaysley da dagh unnane veihsyn ta gatt n’oï, as ver-ym eh gys fea.

⁷ Ta goan y Chiarn goan glen: dy-jarroo myr yn argid, ta er ny ghlenney veih’n ooir, as er ny lheïe shiaght keayrtyn ayns yn aile.

⁸ Nee oo ad y reaylley, O Hiarn: nee oo adsyn y choadey veih’n sheeloghe shoh son dy-bragh.

⁹ Ta ny mee-chrauee gimmeeaght er dy-chooilley cheu: tra t’adsyn er nyn soiaghey seose, ta cloan gheiney er nyn goyrt fo.