Psalmyn 118 - Lioar ny Psalmyn 1765 (Pointed)

PSAL. 118. Confitemini Domino.

¹ O cur-jee booise da’n Chiarn, son t’eh graysoil: son ta e vyghin farraghtyn son dy-bragh.

² Lhig da Israel nish goaill-rish dy vel eh graysoil: as dy vel e vyghin farraghtyn son dy-bragh.

³ Lhig da thie Aaron nish goaill-rish: dy vel e vyghin farraghtyn son dy-bragh.

⁴ Dy-jarroo, lhig dauesyn ta nish aggle orroo roish y Chiarn, goaill-rish: dy vel e vyghin farraghtyn son dy-bragh.

⁵ Deïe mee er y Chiarn ayns my heaghyn: as hug y Chiarn slane clashtyn dou.

⁶ Ta’n Chiarn er my lheh’s: cha bee aggle orrym jeh ny oddys dooinney y yannoo rhym.

⁷ Ta’n Chiarn goaill my phaart mâroosyn ta cooney lhiam: shen-y-fa hee-ym my yeearree er my noidyn.

⁸ Te ny share dy hreishteil ayns y Chiarn: na dy chur barrant erbee gys dooinney.

⁹ Te ny share dy hreishteil ayns y Chiarn: na dy chur treishteil erbee ayns prinsyn.

¹⁰ Ren dy-chooilley ashoon cheet mygeayrt-y-moo'm: agh ayns Ennym y Chiarn nee’m ad y stroie.

¹¹ Ren ad m'y hionney er dy-chooilley cheu, haink ad chione orrym, ta mee gra, er dy-chooilley cheu: agh ayns Ennym y Chiarn stroie-ym ad.

¹² Haink ad mygeayrt-y-moo'm myr shellanyn, as t’ad er ny vooghey myr aile mastey drineyn: son ayns Ennym y Chiarn nee’m ad y stroie.

¹³ T’ow er lhie dy-trome orrym dy my lhieggal: agh va’n Chiarn my chooney.

¹⁴ Ta’n Chiarn my niart as my arrane: as t’eh er jeet dy ve my haualtys.

¹⁵ Ta coraa boggey as slaynt ayns cummallyn y vooinjer chairagh: ta laue yesh y Chiarn coyrt lesh reddyn yindyssagh gys kione.

¹⁶ Ta laue yesh y Chiarn er-skyn ooilley: ta laue yesh y Chiarn cur lesh reddyn yindyssagh mygeayrt.

¹⁷ Cha voym baase, agh bee’m er my reayll bio: dy hoilshaghey magh obbraghyn y Chiarn.

¹⁸ Ta’n Chiarn er my smaghtaghey as er my cherraghey: agh cha vel eh er my livrey harrish gys baase.

¹⁹ Foshil-jee dooys giattyn y chairys: dy voddym goll stiagh orroo, as booise y choyrt da’n Chiarn.

²⁰ Shoh giatt y Chiarn: hed y vooinjer chrauee stiagh ayn.

²¹ Ver-yms booise dhyt, son t’ow er my chlashtyn: as er jeet dy ve my haualtys.

²² Yn chlagh cheddin ren ny masoonee y vee-lowal: ta er jeet dy ve yn ard chlagh chorneilagh.

²³ Shoh jannoo yn Chiarn: as te yindyssagh ayns ny sooillyn ain.

²⁴ Shoh’n laa ta’n Chiarn er n’oardaghey: gow-ee mayd boggey as bee mayd gennal ayn.

²⁵ Cooin lhiam nish, O Hiarn: O Hiarn, cur dooin nish maynrys.

²⁶ Bannit t’eshyn ta cheet ayns Ennym y Chiarn: ta shin er vannaghey diuish ta jeh thie’n Chiarn.

²⁷ Jee yn Chiarn t’er chur dooin soilshey: kaingle-jee yn oural lesh coyrdyn, gys eer eayrkyn yn altar.

²⁸ She uss my Yee, as ver-ym booise dhyt: uss my Yee, as ver-ym moylley dhyt.

²⁹ O cur-jee booise da’n Chiarn, son t’eh graysoil: as ta e vyghin farraghtyn son dy-bragh.