Psalmyn 116 - Lioar ny Psalmyn 1765 (Pointed)

MORNING PRAYER. PSAL. 116. Dilexi quoniam.

¹ Ta mee feer wooiagh: dy vel y Chiarn er chlashtyn coraa my phadjer;

² Dy vel eh er chrommey e chleaysh hym: shen-y-fa nee’m geamagh er choud as vee’m bio.

³ Ren ribbaghyn y vaaish mee y chombaasal mygeayrt: as hooar pianyn niurin greme orrym.

⁴ Hooar mee seaghyn as trimshey, as ren mee geamagh er Ennym y Chiarn: O Hiarn, ta mee guee ort, livrey m’annym.

⁵ Ta’n Chiarn graysoil as cairal: dy-jarroo, ta’n Jee ainyn myghinagh.

⁶ Ta’n Chiarn coadey adsyn ta gyn loght: va mish ayns seaghyn, as chooin eh lhiam.

⁷ Chyndaa reesht eisht gys dt’ea, O my annym: son ta’n Chiarn er choyrt leagh dhyt.

⁸ As cre’n-fa? t’ow er livrey m’annym veih baase: my hooillyn veih jeïr, as my chassyn veih tuittym.

⁹ Nee’ms gimmeeaght kiongoyrt rish y Chiarn: ayns cheer y sleih bio.

¹⁰ Ren mee credjal, as shen-y-fa nee’m loayrt; agh va mee dy-mooar seaghnit: dooyrt mee ayns my hiyr, Ta dy-chooilley ghooinney ny vreagerey.

¹¹ Cre’n cooilleeney ver-ym da’n Chiarn: son ooilley ny bannaghtyn t’eh er hoilshaghey dou?

¹² Nee’ms goaill cappan y taualtys: as nee’m geamagh er Ennym y Chiarn.

¹³ Nee’m my vreearaghyn y eeck nish kionfenish ooilley e phobble: feer deyr ayns shilley’n Chiarn ta baase e nooghyn.

¹⁴ Cur-my-ner, O Hiarn, kys dy vel mish dty harvaant: ta mish dty harvaant, as mac dt’inney-veyl; t’ow er vrishey my chianglaghyn veih my-chielley.

¹⁵ Chebb-ym hoods yn oural dy hoyrt-booise: as nee’m geamagh er Ennym y Chiarn.

¹⁶ Eeck-ym my vreearaghyn gys y Chiarn, ayns fenish ooilley e phobble: ayns cooyrtyn thie yn Chiarn, dy-jarroo, ayns y vean ayds, O Yerusalem. Moylley-jee yn Chiarn.