Psalmyn 115 - Lioar ny Psalmyn 1765 (Pointed)

PSAL. 115. Non nobis, Domine.

¹ Cha nee dooinyn, O Hiarn, cha nee dooinyn, agh da dt’Ennym cur yn moylley: son dty vyghin ghraihagh, as er coontey dt’ynrickys.

² Cre’n-fa jirr ny ashoonyn-quaagh: Cre’n raad ta nish yn Jee oc?

³ Er son y Jee ainyn, t’eh ayns niau: t’eh er n’yannoo myr s’gooidsave lesh.

⁴ Ta ny jallooyn oc argid as airh: eer obbyr laueyn deiney.

⁵ Ta beïll oc as cha vel ad loayrt: ta sooillyn oc as cha vel ad fakin.

⁶ Ta cleayshyn oc as cha vel ad clashtyn: ta stroanyn oc as cha vel ad soaral.

⁷ Ta laueyn oc as cha vel ad loaghtey, cassyn t’oc as cha vel ad shooyll: cha-moo t’ad loayrt trooid nyn scoarnagh.

⁸ T’adsyn ta jannoo ad casley roo: as myr shen t’adsyn ooilley ta cur nyn dreishteil ayndoo.

⁹ Agh uss hie Israel, treisht uss ayns y Chiarn: she eshyn nyn gemmyrk as nyn vendeil.

¹⁰ Shiuish hie Aaron, cur-jee nyn dreishteil ayns y Chiarn: eshyn y fer-coonee as y fendeilagh oc.

¹¹ Shiuish ta goaill aggle roish y Chiarn, cur-jee nyn dreishteil ayns y Chiarn: eshyn y fer-coonee as y fendeilagh oc.

¹² Ta’n Chiarn er chooinaghtyn orrin, as bannee eh shin: dy-jarroo nee eh thie Israel y vannaghey, nee eh bannaghey thie Aaron.

¹³ Nee eh adsyn y vannaghey ta goaill aggle roish y Chiarn: chammah beg as mooar.

¹⁴ Nee’n Chiarn shiuish y vishaghey ny smoo as ny smoo: shiuish as nyn gloan.

¹⁵ Shiuish ta cloan bannit y Chiarn: chroo niau as y thalloo.

¹⁶ Ta ny slane niaughyn lesh y Chiarn: yn thalloo t’eh er choyrt da cloan gheiney.

¹⁷ Cha vel ny merriu coyrt moylley dhyts, O Hiarn: ny adsyn ooilley ta goll sheese ayns yn oaie.

¹⁸ Agh nee shinyn y Chiarn y voylley: veih’n traa shoh magh son dy-bragh. Moylley-jee yn Chiarn.