Psalmyn 114 - Lioar ny Psalmyn 1765 (Pointed)

EVENING PRAYER. PSAL. 114. In exitu Israel.

¹ Tra haink Israel magh ass Egypt: as thie Yacob veih mastey’n pobble joarree,

² Va Judah e ynnyd casherick: as Israel e reeriaght.

³ Honnick y faarkey shoh, as ren eh chea: va Jordan er ny imman noi’n choorse.

⁴ Ren ny sleïtyn lheïme myr reaghyn: as ny croink veggey myr eayin.

⁵ Cre haink orts, O aarkey, dy ren oo chea: as orts, Yordan, dy row er dty imman back?

⁶ Shiuish sleïtyn dy lheïme shiu myr reaghyn: as shiuish chroink veggey myr eayin?

⁷ Bee er-creau, uss halloo, ec fenish y Chiarn: ec fenish Jee Yacob;

⁸ Hyndaa yn chreg chreoi gys poyll-ushtey: as y chlagh-flint gys chibbyr gheill.