Psalmyn 111 - Lioar ny Psalmyn 1765 (Pointed)

PSAL. 111. Confitebor tibi.

¹ Ver-yms booise da’n Chiarn lesh ooilley my chree: ayns sheshaght er-lheh yn vooinjer chrauee, as ayns chaglym y pobble.

² Ta obbraghyn y Chiarn mooar: er nyn gheddyn magh lioroosyn ooilley ta goaill taitnys ayndoo.

³ Ta’n obbyr echey feeu moylley as ooashley: as ta e chairys farraghtyn son dy-bragh.

⁴ Ta’n Chiarn myghinagh as graysoil myr shen er n’yannoo e obbraghyn yindyssagh: dy lhisagh ad ve freillt ayns cooinaghtyn.

⁵ T’eh er chur beaghey dauesyn ta goaill aggle roïsh: bee eh dy-bragh cooinaghtyn er e chonaant.

⁶ T’eh er hoilshaghey da e phobble pooar e obbraghyn: dy voddagh eh cur daue eiraght ny ashoonyn.

⁷ Ta obbraghyn e laueyn ynrickys as briwnys: ta ooilley e annaghyn firrinagh.

⁸ T’ad shassoo shickyr son dy-bragh as dy-bragh: as t’ad jeant ayns firrinys as corrymid.

⁹ T’eh er choyrt feaysley da e phobble: t’eh er haarey e chonaant son dy-bragh; casherick as arrymagh ta’n Ennym echey.

¹⁰ Ta aggle y Chiarn toshiaght creenaght: toiggal mie t’ocsyn ooilley ta dy ymmyrkey ad hene cordail rish; ta’n moylley echey farraghtyn son dy-bragh.