Psalmyn 110 - Lioar ny Psalmyn 1765 (Pointed)

MORNING PRAYER. PSAL. 110. Dixit Dominus.

¹ Dooyrt y Chiarn rish my Hiarn’s: Soie uss er my laue yesh, derrey nee’m dty noidyn y yannoo stoyl dty choshey.

² Nee’n Chiarn lorg dty phooar y chur ass Sion: bee uss dt’er-reill, eer ayns mean dty noidyn.

³ Ayns laa dty phooar nee’n pobble ourallyn-arryltagh y hebbal hoods lesh ooashley crauee: ta druight yn cheet ayd er y theihll veih brein y voghrey.

⁴ Ta’n Chiarn er vreearrey, as cha gow eh arrys: T’ow uss Ard-saggyrt dy-bragh myr va Melchisedech.

⁵ Nee’n Chiarn er dty laue yesh: eer reeaghyn y chur-mow ayns laa e yymmoose.

⁶ Ver eh briwnys mastey ny ashoonyn; lhieenee eh ny ynnydyn lesh ny kirp marroo: as ard-reilltee ymmodee cheeraghyn y chur fo-chosh.

⁷ Iu-ee eh jeh’n strooan er y raad: shen-y-fa troggee eh seose e chione.