Psalmyn 108 - Lioar ny Psalmyn 1765 (Pointed)

EVENING PRAYER. PSAL. 108. Paratum cor meum.

¹ O Yee, ta my chree aggindagh, ta my chree aggindagh: goym arrane, as ver-ym moylley lesh rere my phooar.

² Dooisht, uss lute as chlaasagh: dooisht-yms mee hene feer voghey.

³ Ver-ym booise dhyts, O Hiarn, mastey’n pobble: goym arraneyn-moyllee hoods mastey ny ashoonyn.

⁴ Son ta dty vyghin ny syrjey na ny niaughyn: as ta dty ynrickys roshtyn gys ny bodjallyn.

⁵ Soie oo hene seose, O Yee, er-skyn ny niaughyn: as dty ghloyr er-skyn ooilley yn seihll;

⁶ Dy vod dty chloan reiht v’er nyn livrey: lhig da dty laue yesh ad y hauail, as clasht uss rhyms.

⁷ Ta Jee er loayrt ayns e chasherickys, Nee’m er-y-fa shen boggey ’ghoaill, as rheynn-ym Sichem: as towse-ym magh coan Succoth.

⁸ Ta Gilead lhiam’s, as lhiam’s Manasses: ta Ephraim myrgeddin troshid my khing;

⁹ Ta Judah m’er-reill ’sy leigh, Moab my haagh-nieeaghyn: shooill-ym harrish Edom; harrish Philistia yioym y varriaght.

¹⁰ Quoi nee m'y leeideil gys yn ard-valley lajer: quoi ver lesh mee stiagh gys Edom?

¹¹ Nagh vel uss er hreigeil shin, O Yee: as nagh jean uss, O Yee, goll magh marish ny sheshaghtyn-caggee ain?

¹² O cooin lhien noi’n noid: son s’fardalagh ta cooney dooinney.

¹³ Trooid Jee nee mayd obbraghyn mooarey: as eshyn eh ver fo-chosh nyn noidyn.