Psalmyn 107 - Lioar ny Psalmyn 1765 (Pointed)

MORNING PRAYER. PSAL. 107. Confitemini Domino.

¹ O cur-jee booise da’n Chiarn, son t’eh graysoil: as ta e vyghin farraghtyn son dy-bragh.

² Lhig dauesyn booise y choyrt ta’n Chiarn er nyn veaysley: as er nyn livrey veih laue yn noid;

³ As er nyn jaglym ass ny cheeraghyn, veih’n niar, as veih’n neear: veih’n tooaie, as veih’n jiass.

⁴ Hie ad er-shaghryn ayns yn aasagh ass y raad: as cha dooar ad ard-valley erbee dy chummal ayn;

⁵ Accryssagh as pa-agh: hug yn annym oc naardey ayndoo.

⁶ Eisht deïe ad er y Chiarn ayns nyn seaghyn: as livrey eh ad ass nyn jennid.

⁷ Leeid eh ad magh er y raad cair: dy voddagh ad goll gys ard-valley dy ooraghey ad hene.

⁸ O dy jinnagh deiney er-y-fa shen yn Chiarn y voylley son e vieys: as fockley magh ny yindyssyn t’eh dy yannoo son cloan gheiney!

⁹ Son t’eh jannoo magh yn annym follym: as lhieeney yn annym accryssagh lesh mieys;

¹⁰ Lheid as ta ny hoie ayns dorraghys, as ayns scadoo yn vaaish: kainlt dy-shickyr ayns geulaghyn yiarn.

¹¹ Er-yn-oyr dy row ad mee-viallagh gys goan y Chiarn: as ren ad beg y hoiaghey jeh coyrle yn Er syrjey;

¹² Ren eh neesht ny creeaghyn oc y injillaghey trooid seaghyn: huitt ad sheese, as cha row unnane erbee dy chooney lhieu.

¹³ Myr shen tra deïe ad gys y Chiarn ayns nyn seaghyn: livrey eh ad ass nyn jennid.

¹⁴ Hug eh lesh ad magh ass dorraghys, as scadoo yn vaaish: as vrish eh ny kianglaghyn oc veih my-chielley.

¹⁵ O dy jinnagh deiney er-y-fa shen yn Chiarn y voylley son e vieys: as fockley magh ny yindyssyn t’eh dy yannoo son cloan gheiney!

¹⁶ Son t’eh er vrishey ny giattyn-prash: as er yiarey ny barryn yiarn veih my-chielley.

¹⁷ Ta deiney ommijagh er nyn gherraghey son nyn ghrogh-yannoo: as kyndagh rish nyn olkys.

¹⁸ Va dwoaie ec yn annym oc er dy-chooilley cheint dy veaghey: as v’ad dy-jarroo faggys ec dorrys y vaaish.

¹⁹ Myr shen tra deïe ad gys y Chiarn ayns nyn seaghyn: livrey eh ad ass nyn jennid.

²⁰ Chur eh magh e ockle, as ren eh ad y lheihys: as v’ad er ny sauail veih nyn doyrt-mow.

²¹ O dy jinnagh deiney er-y-fa shen yn Chiarn y voylley son e vieys: as fockley magh ny yindyssyn t’eh dy yannoo son cloan gheiney!

²² Dy jebbagh ad da oural dy hoyrt-booise: as ny obbraghyn echey y ockley magh lesh gennallys.

²³ Adsyn ta goll er yn aarkey ayns lhongyn: as ta dellal ayns ny hushtaghyn mooarey,

²⁴ Ad shoh ta fakin obbraghyn y Chiarn: as e yindyssyn ayns y diunid.

²⁵ Son ec e ockle ta’n gheay stermagh girree: ta troggal seose ny tonnyn echey.

²⁶ T’ad er nyn ymmyrkey seose ’syn aer, as sheese reesht gys y diunid: ta’n annym oc lheïe ersooyl er coontey nyn seaghyn.

²⁷ T’ad criht noon as noall, as leaystey myr dooinney meshtal: as t’ad ec kione nyn geïlley.

²⁸ Myr shen tra t’ad geamagh gys y Chiarn ayns nyn seaghyn: t’eh dy livrey ad ass nyn jennid.

²⁹ T’eh cur er y sterrym dy ve kuine: myr shen dy vel ny tonnyn goaill fea.

³⁰ Eisht t’ad gennal, er-yn-oyr dy vel ad ec fea: as myr shen t’eh dy chur lesh ad gys y phurt baïlliu ’ve ayn.

³¹ O dy jinnagh deiney er-y-fa shen yn Chiarn y voylley son e vieys: as fockley magh ny yindyssyn t’eh dy yannoo son cloan gheiney!

³² Dy jinnagh ad eshyn neesht y ghloyraghey ayns sheshaght y pobble: as eh y voylley ayns stoyl y chanstyr!

³³ Ta chyndaa ny thooillaghyn gys faasagh: as chyrmaghey seose ny farraneyn-ushtey.

³⁴ Cheer messoil t’eh dy yannoo faase: er coontey’n drogh-yannoo ocsyn ta vaghey ayn.

³⁵ Reesht t’eh jannoo yn aasagh ny loghan ushtey: as geillyn jeh thalloo chirrym.

³⁶ As ayns shen t’eh soiaghey ny accryssee: dy vod ad ard-valley y hroggal daue hene dy chummal ayn;

³⁷ Dy vod ad nyn dhalloo y chuirr, as garaghyn-feeyney y hoiaghey: dy ymmyrkey magh daue ny messyn dy vishaghey.

³⁸ T’eh dy nyn mannaghey ad, dy vel ad bishaghey er-skyn towse: as cha vel eh surranse da’n maase oc dy ve ny sloo ayns earroo.

³⁹ Reesht, tra t’ad er nyn leodaghey as er nyn injillaghey: liorish tranlaase, trooid arkys ny seaghyn erbee;

⁴⁰ Ga dy vel eh surranse ad dy gheddyn drogh ghellal veih reilltee tranlaasagh: as lhiggey daue goll er-shaghryn jeh’n raad ayns yn aasagh;

⁴¹ Ny-yeih t’eh cooney lesh y voght ass e heaghyn: as bishaghey’n lught-thie echey myr shioltane keyrragh.

⁴² Smooinee yn vooinjer chairagh er shoh, as gow-ee ad boggey: as bee beeall dy-chooilley olkys er ny yeigh.

⁴³ Quoi-erbee ta creeney nee ad goaill ny reddyn shoh gys nyn gree: as toigg-ee ad kenjallys-ghraihagh y Chiarn.