Psalmyn 105 - Lioar ny Psalmyn 1765 (Pointed)

MORNING PRAYER. PSAL. 105. Confitemini Domino.

¹ O cur-jee booise da’n Chiarn, as eïe-jee er yn Ennym echey: insh-jee da’n pobble cre ny reddyn t’eh er n’yannoo.

² O lhig da ny arraneyn eu ’ve jehsyn, as moylley-jee eh: as lhig da’n taggloo eu ’ve mychione ooilley e obbraghyn yindyssagh.

³ Gow-jee boggey ayns yn Ennym casherick echey: lhig da’n cree ocsyn ’ve gennal ta shirrey lurg y Chiarn.

⁴ Shirr-jee yn Chiarn as e niart: shirr-jee e eddin er son dy-bragh.

⁵ Cooinee-jee er ny obbraghyn yindyssagh t’eh er n’yannoo: e virrillyn, as briwnyssyn e veeall;

⁶ O shiuish sluight Abraham e harvaant: shiuish chloan Yacob t’eh er reih.

⁷ Eshyn y Chiarn y Jee ain: ta e vriwnyssyn ayns ooilley’n seihll.

⁸ T’eh er ny ve kinjagh cooinaghtagh jeh e chonaant as e yialdinyn: ren eh da thousane dy heelogheyn;

⁹ Yn eer conaant ren eh rish Abraham: as y breearrey loo eh da Isaac;

¹⁰ As shen doardee eh da Jacob son leigh: as da Israel son conaant dy-bragh farraghtyn;

¹¹ Gra, Dhyts ver-ym thalloo Canaan: cronney nyn eiraght.

¹² Tra nagh row ad foast agh beggan jeu: as adsyn nyn yoarreeyn ayns y cheer;

¹³ Tra v’ad scughey veih ashoon gys ashoon: veih un reeriaght gys pobble elley;

¹⁴ Cha lhig eh da dooinney erbee aggair ’yannoo daue: agh hug eh oghsan da eer reeaghyn er y ghraih oc.

¹⁵ Ny benn-jee rish my Er-ooïllit: as ny jean-jee veg y skielley da my adeyryn.

¹⁶ Marish shen, doardee eh genney er y cheer: as stroie eh yn slane beaghey dy arran.

¹⁷ Agh hug eshyn dooinney rhymboo: dy-jarroo Joseph, va er ny chreck son sharvaant ayns bondiaght;

¹⁸ E chassyn ren ad y lhottey lesh geulaghyn: hie gooin y yiarn stiagh gys e chree;

¹⁹ Derrey haink y traa dy row e chooish er ny hoilshaghey: ren goo yn Chiarn eshyn y phrowal.

²⁰ Hug y ree chaghter dy eaysley eh: hug prince y phobble e reamys da.

²¹ Ren eh eh ny hiarn myrgeddin harrish e hie: as kiannoort harrish ooilley e ream;

²² Dy oardrail e phrinsyn lurg e aigney: as creenaght y ynsaghey da e ir-choyrlee.

²³ Haink Israel myrgeddin gys Egypt: as va Jacob ny yoarree ayns cheer Ham.

²⁴ As vishee eh yn pobble echey dy-yindyssagh: as ren eh ad ny s’troshey na nyn noidyn;

²⁵ Ny creeaghyn ocsyn va myr shen er ny hyndaa, dy row dwoaie oc er e phobble: as hug ad drogh ghellal da e harvaantyn.

²⁶ Eisht hug eshyn Moses e harvaant: as Aaron, v’eh er ny reih;

²⁷ As hoilshee ad shoh e chowraghyn ny mast’ oc: as yindyssyn ayns cheer Ham.

²⁸ Doardee eh dorraghys, as ve dorraghey: agh cha row ad arrymagh da e ghoo.

²⁹ Hyndaa eh ny hushtaghyn oc gys fuill: as stroie eh yn eeast oc.

³⁰ Ren y cheer oc gymmyrkey magh froggyn: ayns eer shamyryn nyn reeaghyn.

³¹ Loayr eh yn fockle, as haink dy-chooilley cheint dy veishteigyn: as meeylyn ayns ooilley ny ardjyn oc.

³² Hug eh daue claghyn-sniaghtee ayns ynnyd fliaghey: as lossaghyn aile ayns y cheer oc.

³³ Woaill eh neesht ny biljyn-feeyney as ny biljyn-figgagh oc: as hug eh naardey ny biljyn v’ayns ny ardjyn oc.

³⁴ Loayr eh yn fockle, as haink ny locustyn, as praddagyn er-skyn-earroo: as die ad seose ooilley yn faiyr v’ayns y cheer oc, as stroie ad messyn y thallooin.

³⁵ Varr eh ooilley yn chied er ny ruggey ayns nyn jeer: dy-jarroo toshiaght ooilley nyn niart.

³⁶ Hug eh lesh ad magh myrgeddin lesh argid as airh: cha row un phersoon annoon mastey ny kynneeyn oc.

³⁷ Va Egypt laane dy voggey tra jimmee ad rhymboo: son v’ad ayns aggle roue.

³⁸ Skeayll eh magh bodjal dy choodaghey ad: as aile dy chur soilshey daue ’syn oie.

³⁹ Ec nyn yeearree hug eh lesh quaylyn: as lhieen eh ad lesh arran veih niau.

⁴⁰ Doshil eh yn chreg chloaie, as haink yn ushtey magh myr thooilley: myr shen dy roih awinyn ayns ynnydyn chyrmey.

⁴¹ Son cre’n-oyr? chooinee eh er e yialdyn casherick: as er Abraham e harvaant.

⁴² As hug eh lesh magh e phobble lesh boggey: as e chloan reiht lesh gennallys;

⁴³ As hug eh daue thalloo ny ashoonyn: as ghow ad laboraght y phobble son eiraght;

⁴⁴ Dy voddagh ad freayll e ’lattyssyn: as geill y choyrt da e leighyn.