Psalmyn 10 - Lioar ny Psalmyn 1765 (Pointed)

PSAL. 10. Ut quid, Domine.

¹ Cre hon t’ow shassoo choud jeh, O Hiarn: as follaghey dt’eddin ayns y traa fêmoil dy heaghyn?

² Ta’n mee-chrauee dy chooilleeney e aigney hene jannoo tranlaase er y voght: lhig daue hene ve goit ayns ny kialgyn croutagh t’ad er ghoaill ayns nyn smooinaghtyn.

³ Son ta’n dooinney mee-chrauee er voggyssagh jeh yeearree e chree hene: as loayrt dy-mie jeh’n er sayntoilagh ta feoh ec Jee er.

⁴ Ta’n mee-chrauee cha mooaralagh, nagh vel geill echey da Jee: cha-moo ta Jee ayns ooilley e smooinaghtyn.

⁵ Ta ny raaidyn echey kinjagh seaghnagh: ta dty vriwnyssyn foddey er-skyn roshtyn e hilley, as er yn oyr shen t’eh cur-y-laan fo ooilley e noidyn.

⁶ Son t’eh er ghra ayns e chree, Cha n’aggle dou, cha bee’m dy-bragh er my hilgey sheese: cha daghyr skielley erbee my raad.

⁷ Ta’n beeal echey laane dy ghweeaghyn, dy oalsaght as molteyrys: fo e hengey ta mee-chraueeaght as fardail.

⁸ T’eh soie fo-chlea myr maarliagh ayns corneilyn fadaan ny straaidyn: as dy-follit ayns e oayldyn dorraghey t’eh dunverys yn dooinney gyn loght; ta e hooillyn soit noi’n voght.

⁹ Son t’eh lhie farkiaght dy-follit, dy-jarroo myr lion t’eh ny lhie kellit ayns e ooig: dy vod eh spooilley yn boght.

¹⁰ T’eh jannoo niart er y voght: tra t’eh tayrtyn eh ayns e ribbeh.

¹¹ T’eh tuittym sheese, as crommey eh hene: dy vod sheshaght ny boghtyn tuittym ayns laueyn e leeideilee.

¹² T’eh er ghra ayns e chree, Cha vel aggle orrym, ta Jee er yarrood: t’eh follaghey e eddin, as cha der eh dy-bragh geill da.

¹³ Irree, O Hiarn Yee, as trogg seose dty laue: ny jarrood yn boght.

¹⁴ Cre’n-fa yinnagh y dooinney olkyssagh loayrt dy-mollaghtagh noi Jee: choud as t’eh gra ayns e chree, Cha vel aggle orrym, s’cummey lhiats, O Yee, er y hon.

¹⁵ Shickyr t’ow er vakin eh: son t’ow goaill tastey jeh mee-chraueeaght as aggair.

¹⁶ Dy vod oo goaill y chooish ayns dty laue hene: ta’n boght coyrt e varrant hoods; son uss yn fer-coonee ocsyn ta gyn caarjyn.

¹⁷ Brish uss pooar yn mee-chrauee as goanlyssagh: gow ersooyl yn vee-chraueeaght echey, nagh bee veg jeh ry-gheddyn.

¹⁸ Ta’n Chiarn ny Ree son dy-bragh as dy-bragh: as ta ny ashoonyn er cherraghtyn ass y cheer.

¹⁹ Hiarn, t’ow er chlashtyn yeearree ny boghtyn: t’ow niartaghey ny creeaghyn oc, as ta dty chleaysh geaishtagh roo;

²⁰ Dy chooney lesh y chloan gyn ayr as y boght gys nyn gair: nagh bee yn dooinney seihltagh ny sodjey er ny hoiaghey seose nyn ’oï.