Psalmyn 90 - Psalmyn Ghavid 1761 (Metrical)

PSALM XC.

¹ Hiarn, nyn saualtagh niartal rieau, D’endeil dty reih hioltane; Veih eash dy eash t’ou er ny ve Yn sauchys shickyr ain.

² Roish my ren sleïtyn cheet er-ash, Roish ren oo’n seihll y chroo: V’ou uss yn ooilley-niartal Jee, Nish yn Jee cheddin oo.

³ T’ou caghlaa’n dooinney, Hiarn, gys joan, Ass ren oo ’chummey eh; Cha leah’s ta’n sarey raït, Chyndaa, Sheign biallys y ve.

⁴ Son ayns dty hilley thousane bleïn Cha vel agh myr un laa; Ny myr oor ceaut er dromm ny hoie, Nagh vel mooar geill ain da.

⁵ Goit myr lesh thooilley, ta shin stroit, As chea myr dreamal oie: Gaase seose ’sy voghrey, goll-rish blaa, Rere myr ta’n ghrian ceau bree.

^6-9 Agh cre-erbee cha glass as te, Cre-wooads yn aalid t’ayn: Te giarit sheese, fiojit, as creen, My jig y laa gys kione.

¹⁰ Seihll dooinney three feed bleïn as jeih, Stiark ta goll seose er shen; As my ta fer erbee cha trean Dy heet gys kiare feed blein. E hroshid eisht cha bee eh veg Agh trimshey as angaish; Snaih’n vea (ta faase) vees brisht, as eisht, Geyre farkiaght er ta’n baase.