Psalmyn 22 - Psalmyn Ghavid 1761 (Metrical)

PSALM XXII. PART I

¹ My Yee, my Yee, jeeagh neose veih niau, Jeeagh er my hrimshey trome; Cre’n-fa t’ou nish er my hreigeil, As cummal foddey voym?

² My Yee, er fey-ny-laa hood geam Cha vel oo clashtyn mee; As aash ny fea cha vel mee goaill Er imbagh doo ny hoie.

⁴ Ort hug nyn ayraghyn nyn dreisht, Er dty endeilys fieau;

⁵ Lesh aghin jeean ghuee ad son couyr As ren oo cooney lhieu.

⁶ Agh mish ta coontit myr beishteig, Nagh ruggyr jeh sheelnaue; Ta jiooldit magh veih sheshaght sleih, As jeeaghyn feohdagh daue.

PART II.

⁷ Ayns gearey floutagh ren y theay Nyn ghing mooaralagh craa; Sheeyney nyn meillyn magh ayns craid D’oltooaney mee as gra:

⁸ Dooyrt eh, She mish mac graihagh Yee, Ayn ta my slane treishteil; Lhig Jee cheet neose dy ghoaill e phaart, My sallish eh hauail.

¹¹ Ny treig mee ayns my heaghyn dowin Ny follee dt’eddin voym; Tar uss, my chouyr; cha vel, my Yee, Fer-coonee elley ayn.

PART III.

¹⁶ My laueyn ren ad ’hreiney trooid, Hrein ad my chassyn neesht;

¹⁷ As hass ad blakey seose nyn rheyrt Gyn accan ny erreeish.

¹⁸ My gharmadyn ren ad y rheyn, Dagh unnane goaill e chron; As hilg ad lottyn er my chooat, Son nagh row whaaley ayn.

¹⁹ Ny treig mee ayns my heaghyn dowin, Ny follee dt’eddin voym; Tar uss, my chouyr; cha vel, my Yee, Fer-coonee elley ayn.